22 шілде спорт тарихында: Олимпиада рекордтары мен аңызға айналған жекпе-жектер

Автоспорттың бастау алған күні

1894 жыл – Парижде тарихтағы алғашқы автокөлік жарысы өтті. Оны француздың La Petite Journal газетінің бас редакторы Пьер Жиффар ұйымдастырды. Бұл қазіргідей жылдамдық жарысы емес, қозғалтқыштардың сенімділігін сынауға арналған байқау болды.

Париж – Руан бағытындағы 126 шақырымдық қашықтықта бу, бензин, электр, пневматикалық және гидравликалық қозғалтқыштары бар көліктер бақ сынады. Мәре сызығын бірінші болып граф Альбер де Дионның бу қозғалтқышымен жабдықталған De Dion-Bouton көлігі кесіп өтті. Алайда төрешілер оны тым ауыр әрі сенімсіз деп танып, жеңісті бензин қозғалтқышымен жабдықталған Peugeot және Panhard-Levassor автомобильдеріне берді.

Бокс тарихына енген жекпе-жек

1963 жыл – америкалық боксшы Сонни Листон Лас-Вегаста өткен реваншта жерлесі Флойд Паттерсонды бірінші раундтың 2 минут 10 секундында нокаутқа түсіріп, WBA, WBC және The Ring тұжырымдары бойынша ауыр салмақтағы чемпиондық атақтарын қорғап қалды.

Ол кезеңде екі чемпиондық белбеуді иелену абсолютті әлем чемпионы мәртебесін білдіретін. Осылайша Листон Мұхаммед Әлимен кездескенге дейін ауыр салмақтың сөзсіз көшбасшысы болды.

Владимир Сальниковтың тарихи рекорды

1980 жыл – Мәскеу Олимпиадасында кеңестік жүзуші Владимир Сальников 1500 метрге еркін стильде 14:58,27 нәтижесін көрсетіп, бұл қашықтықты 15 минуттан аз уақытта жүзіп өткен тарихтағы алғашқы спортшы атанды.

Сальников өз мансабында төрт Олимпиада алтынын және төрт әлем чемпионатының алтын медалін жеңіп алған.

Наим Сүлейманоғлының тарихи жетістігі

1996 жыл – Атланта Олимпиадасында түркиялық ауыр атлет Наим Сүлейманоғлы Олимпиада ойындарының үш дүркін чемпионы атанған алғашқы зілтемірші болды.

64 келіге дейінгі салмақ дәрежесінде ол қоссайыс қорытындысы бойынша 335 келіні бағындырды. Мансабында Сүлейманоғлы ауыр атлетикадан 46 әлем рекордын орнатты: оның 26-сы Болгария, 20-сы Түркия құрамасының сапында тіркелген.

Артуро Гаттидің соңғы ірі жеңілістерінің бірі

2006 жыл – аргентиналық Карлос Бальдомир әйгілі канадалық боксшы Артуро Гаттиді тоғызыншы раундта техникалық нокаутпен жеңіп, WBC тұжырымы бойынша жартылай орта салмақтағы әлем чемпионы атағын қорғап қалды.

Бұл Гаттидің мансабындағы соңғы маңызды жекпе-жектердің бірі болды. 2007 жылы Альфонсо Гоместен жеңілгеннен кейін ол кәсіпқой бокстан кетті.

Екі жылдан соң Артуро Гаттидің мәйіті Бразилиядағы Порту-де-Галиньяс курортындағы қонақүйден табылды. Алғашында оның өліміне жұбайы Аманда Родригес күдікті ретінде қарастырылғанымен, кейін ресми тергеу бұл оқиғаны өз-өзіне қол жұмсау деп қорытындылады. Алайда тәуелсіз тергеушілер бұл нұсқамен келіспей, боксшының кісі қолынан қаза тапқанын мәлімдеген. Соған қарамастан, олардың дәлелдері заңды күшке ие болмады.

 «Тур де Франс» тарихынан

2012 жыл – осы күні британиялық велошабандоз Брэдли Уиггинс (Team Sky) әйгілі «Тур де Франс» көпкүндігінің 99-шы жарысында жеңіске жетті. Осылайша ол әлемдегі ең беделді веложарыстың жеңімпазы атанған тарихтағы алғашқы британдық спортшы болды.

Осы күні дүниеге келгендер

1980 жыл – Скотт Диксон, Жаңа Зеландияның автожарысшысы, IndyCar Series біріншілігінің бірнеше дүркін чемпионы.

1983 жыл – Марина Шумакова, үстел теннисінен Қазақстанның спорт шебері, 2008 жылғы Бейжің Олимпиадасының қатысушысы.

1989 жыл – Исраэль Адесанья, нигериялық ММА шебері, UFC ұйымының орта салмақтағы бұрынғы екі дүркін чемпионы.

1998 жыл – Марк Кукурелья, испаниялық футболшы, 2024 жылғы Еуропа чемпионы, Токио Олимпиадасының күміс жүлдегері, мадридтік «Реал» клубының ойыншысы.