Адольф Гитлер Олимпиада ойындарын ашты, Майк Тайсон Лас-Вегаста жеңіске жетті: спорт тарихындағы бұл күн

Тарихтағы ең суық «Тур де Франс»

1909 – дәл осы күні люксембургтік велошабандоз Франсуа Фабер беделді көпкүндік шосселік веложарыс «Тур де Франстың» алғашқы шетелдік жеңімпазы атанды. Бұл жыл «Үлкен ілмек» үшін тарихтағы ең суық маусымдардың бірі болды: ауа температурасы қыс мезгіліне жақын еді. Люксембург спортшысы жаңбыр мен қар аралас ауа райында қатарынан бес кезеңде жеңіске жетті.

Фабердің дене бітімі велошабандоздар үшін ерекше ірі болды: бойы 180 см болса, салмағы 91 кг еді. Осыған байланысты ол туған жеріне байланысты «Коломбтың алыбы» деген лақап атқа ие болды. Сол кезеңде ол ең нәтижелі спортшылардың бірі саналды.

Адольф Гитлер Олимпиада ойындарын ашты

1936 – осы күні Берлиндегі «Олимпиялық» стадионда XI жазғы Олимпиада ойындарының салтанатты ашылу рәсімі өтті. Бұл Екінші дүниежүзілік соғысқа дейінгі соңғы Олимпиада болды.

Олимпиаданың ресми ашылуын нацистік Германияның фюрері әрі жоғарғы бас қолбасшысы Адольф Гитлер жариялады. Берлин Олимпиадасына 51 елден 4000 спортшы қатысты. Бұл ойындарда Ауғанстан, Бермуд аралдары, Боливия, Коста-Рика, Лихтенштейн және Перу құрамалары алғаш рет өнер көрсетті.

Дәл осы Олимпиадада алғаш рет олимпиадалық алау эстафетасы ұйымдастырылып, ашылу рәсімі алғаш рет тікелей эфирде көрсетілді.

Германия Берлин Олимпиадасын насихат құралы ретінде пайдаланып, елдегі нәсілшілдік пен антисемиттік саясатты, сондай-ақ күшейіп келе жатқан милитаризмді жасыруға тырысты. Олимпиада шетелдік қонақтарға бейбіт ел бейнесін көрсету мақсатында ұйымдастырылды.

Ники Лауда болидінде тірідей жанып кете жаздады

1976 – дәл осы күні Формула-1 жарысының австриялық шабандозы Ники Лауда Германия Гран-приінде ауыр апатқа ұшырады. Кей деректерге сүйенсек, оның көлігі артқы аспа жүйесінің ақауына байланысты трассадан шығып кеткен. Қоршауға соғылғаннан кейін Лауданың болиду өртеніп, қайтадан трассаға ұшып шықты. Сол сәтте артынан келе жатқан америкалық Брет Ланджер жоғары жылдамдықпен жанып жатқан көлікке соғылды. Абырой болғанда, Ланджер көліктен дер кезінде шығып үлгерді. Ол Артуро Мерцарио, Харальд Эртль және Гай Эдвардспен бірге Ники Лауданы құтқаруға ұмтылды.

Дулығасы шешіліп кеткен Лауда басынан ауыр күйік алды. Алғашында есін жоғалтпағанымен, ауруханада комаға түсті. Алты аптадан кейін Ники Лауда қайтадан жарысқа орала алды.

Майк Тайсонның тарихи жетістігі

1987 – дәл осы күні аса ауыр салмақта өнер көрсеткен америкалық аңыз боксшы Майк Тайсон Лас-Вегаста өткен жекпе-жекте отандасы Тони Таккерді төрешілердің бірауыздан шығарған шешімімен жеңді. Бұл кездесу абсолютті әлем чемпионы атағы үшін өтті. 12 раунд қорытындысы бойынша барлық төрешілер «Темір Майкқа» жеңісті берді: 119–111, 118–113 және 116–112. Осы жеңістің арқасында Тайсон 21 жасында сол кездегі ең жас абсолютті әлем чемпионы атанды.

Грекиядағы жеңіл атлетика мерекесі

1997 – осы күні Афина қаласында жеңіл атлетикадан VI әлем чемпионатының ашылу рәсімі өтті. Бұл Грекияда өткен алғашқы әлем чемпионаты еді. Жалпыкомандалық медаль есебінде АҚШ, Германия және Куба құрамалары үздік үштікке енді. Дәл осы Афинада аңыз украиндық сырықпен секіруші Сергей Бубка 6,01 метр нәтижемен әлем чемпионаттарының рекордын жаңартып, алты дүркін әлем чемпионы атанды.

Бұл күні дүниеге келгендер:

1945 – Иван Гаранин, кеңестік және қазақстандық шаңғышы, 1976 жылы Инсбрукта өткен Олимпиада ойындарының екі дүркін қола жүлдегері.

1986 – Елена Веснина, ресейлік теннисші, 2016 жылғы Рио-де-Жанейро Олимпиадасының жұптық сындағы чемпионы.

1994 – Доменико Берарди, италиялық «Сассуоло» клубы мен Италия құрамасының шабуылшысы, Еуропа чемпионы (2020).