Аида Әбікеева Азия ойындарында жүлдеге бір қадам қалғанда сүрінді
ҚР ҰОК
Қазақстандық боксшы Аида Әбікеева Жапонияның Айти және Нагоя қалаларында өтіп жатқан 2026 жылғы Азия ойындарындағы жарысын аяқтады.
65 келіге дейінгі салмақтағы ширек финалда Әбікеева Қытай өкілі Шу Лиге төрешілер шешімімен 0:4 есебімен жеңілді.
Жекпе-жек үш раундқа созылды. Кездесу қорытындысы бойынша төрешілер қытайлық боксшының жеңісін тіркеді. Осылайша Шу Ли жартылай финалға жолдама алса, Әбікеева Азия ойындарындағы жарысын аяқтады.
Бұл – қазақстандық боксшының Азия ойындарына алғаш рет қатысуы. Оның ұлттық құрама сапына енуіне соңғы халықаралық жарыстардағы нәтижелері әсер етті.
2025 жылы Әбікеева Ливерпульде өткен World Boxing ұйымының әлем чемпионатында 65 келіге дейінгі салмақта чемпион атанды. Финалда ол Өзбекстан өкілі Навбахор Хамидованы жеңді. Ал 2026 жылы қазақстандық боксшы Бразилияда өткен әлем кубогының кезеңінде күміс, Гуйяндағы турнирде қола медаль иеленді.
Осылайша Аида Әбікеева Азия ойындарының жартылай финалына шыға алмады. Қазақстанның әйелдер құрамасы сапында Алуа Балқыбекова, Назым Қызайбай, Виктория Графеева және Наталья Богданова да өнер көрсетіп жатыр.