«Әл-Наср» «Әл-Дирияны» ойсырата жеңіп, Король кубогының 1/8 финалына шықты
«Әл-Наср» ФК
1/16 финалдық кездесуде Эр-Рияд клубы сырт алаңда «Әл-Дирияны» 4:1 есебімен жеңді.
Алайда фаворит үшін матчтың басталуы күтпеген жерден өрбіді. Кездесудің 2-минутында алаң иелері өз мүмкіндігін пайдаланып, есеп ашты. Голды испаниялық жартылай қорғаушы Оскар Родригес соқты.
Жіберіп алған гол «Әл-Насрды» шабуылға белсендірек шығуға мәжбүр етті. Қонақтар бастаманы тез қолға алып, үзіліске дейін-ақ матч тағдырын іс жүзінде шешіп қойды. 11-минутта Мохамед Симакан есепті теңестірді.
Кейін Жоау Феликстің кезегі келді. Португалиялық футболшы 36-минутта «Әл-Дирия» қақпасын дәл көздеп, командасын алға шығарды. Арада бір минут өткенде Абдулла әл-Хамдан Эр-Рияд клубының басымдығын арттырды — 3:1.
Екінші таймда матчтағы интрига түбегейлі жоғалды. «Әл-Наср» шабуылын жалғастырып, 68-минутта Феликс тағы бір гол соқты. Португалиялық ойыншының дублі матчтың қорытынды есебін белгіледі — 4:1.
Король кубогы, 1/16 финал
«Әл-Дирия» — «Әл-Наср» — 1:4
Голдар: 2' Родригес, 11' Симакан, 36', 68' Жоау Феликс, 37' әл-Хамдан.
Айта кетейік, Криштиану Роналдудың матчқа қатыспауы назар аудартты. «Әл-Наср» капитаны бұл жолы да кездесуге өтінімге енгізілген жоқ. Португалиялық футболшы ұлттық чемпионаттың алғашқы турын да өткізіп алған. Осылайша, ол 2026/27 маусымында әзірге бірде-бір ресми матчқа қатысқан жоқ.
Енді «Әл-Наср» Король кубогындағы жорығын 1/8 финалда жалғастырады. Команданың келесі қарсыласы жеребе тартылғаннан кейін анықталады.
Ал Роналду соңғы күндері футболдан тыс жаңалығымен де көпшіліктің назарын аударды. Португалиялық жұлдыз Джорджина Родригеске үйленетінін әлеуметтік желідегі жазылушыларына хабарлады.
