Әлімханұлы Ширазға промоутерлік саудадан кейін шарт қойды
Фото: Getty Images
Жеңіліп көрмеген қазақстандық боксшы Жәнібек Әлімханұлы WBO нұсқасы бойынша екінші орта салмақтағы әлем чемпионы Хамза Ширазбен ықтимал жекпе-жегін ұйымдастыруға арналған промоутерлік сауданың қорытындысына пікір білдірді.
Сауда 16 қыркүйекте өтті. Жекпе-жекті өткізу құқығын Шираздың мүддесін қорғайтын британдық Queensberry Promotions алды. Компания жекпе-жекті ұйымдастыру үшін 1 001 809 доллар ұсынды. Ал Әлімханұлымен жұмыс істейтін Top Rank 820 мың доллар көлемінде өтінім берді.
Нәтиже жарияланғаннан кейін қазақстандық боксшы Instagram желісінде ықтимал қарсыласына үн қатты. Әлімханұлы Ширазға шешім қабылдау үшін екі күн берілгенін атап өтті.
«Оған екі күн берілді. Оның не шешетінін көрейік! Жекпе-жекке шықса – шығады, ал шықпаса, белбеуді босатады», – деп жазды боксшы.
Енді тараптар жекпе-жектің нақты өтетін күні мен орнын келісуі керек. The Ring мәліметінше, қарастырылып жатқан қалалардың қатарында Лондон, Бирмингем және Нью-Йорк бар. Алдын ала кездесу 28 қарашада немесе 5 желтоқсанда өтуі мүмкін.
Еске салайық, Жәнібек өзінің соңғы ресми жекпе-жегін 2025 жылдың сәуірінде Астанада өткізді. Оның қарсыласы Анауэль Нгамиссенге болды. Кездесу қазақстандық боксшының мерзімінен бұрын жеңісімен аяқталды.