Алмабаев UFC-дегі жекпе-жегінің алдында қалай жеңіліске ұшырай жаздағанын айтты
Фото: Getty Images
Қазақстандық UFC жауынгері Асу Алмабаев америкалық Чарльз Джонсонға қарсы жеңісті жекпе-жегінің қаншалықты қауіпті болғанын айтып, сондай-ақ промоушеннен алған рекордтық бонус туралы пікір білдірді.
Қазақстандық спортшының айтуынша, жекпе-жектің бір сәтінде ол өте қиын жағдайға тап болып, мерзімінен бұрын жеңіліп қалуға шақ қалған.
«Қайтарма үшбұрыш әдісіне түсіп қалдым. Өзім бұл әдісті үнемі жаттықтырып, бір күні жекпе-жекте қолданамын деп ойлайтынмын, бірақ керісінше өзім сол жағдайға түстім», – деді Алмабаев Namys Fighting YouTube-арнасына берген сұхбатында.
Жауынгер бұл сәттің шынымен де қауіпті болғанын атап өтті.
«Шынымды айтсам, өзім есімнен танып қала жаздадым. Бірақ, бәлкім, қазақы мінез бен тәжірибе көмектесті», – деді Асу.
Еске сала кетейік, ең жеңіл салмақтағы жекпе-жек үшінші раундқа дейін созылды. Шешуші кезеңде Алмабаев әсерлі ауырту әдісін жасап, Джонсонды берілуге мәжбүр етті.
Турнирден кейін UFC «Кештің үздік өнері» үшін берілетін бонустарды жариялап, оның иегерлерінің бірі ретінде қазақстандық файтерді атады. Жарқын жеңісі үшін Алмабаев 100 мың доллар сыйақы алды.
Жауынгер бұл жағдайға қатысты әзіл айтуды да ұмытпады.
«Соманы тағы да өсіріпті, енді 100 мың доллар болды. Бірден 300 мың беру керек еді», – деп әзілдеді Алмабаев.
Осылайша, Асу Қазақстан ММА тарихына еніп, UFC-де бір жекпе-жек үшін 100 мың доллар бонус алған алғашқы отандық спортшы атанды.