«Ақтөбе Ж» «Жайықты» минималды есеппен жеңді
«Ақтөбе» ФК
Ақтөбеде Қазақстан Бірінші лигасының 20-турындағы матч аяқталды. Жергілікті «Ақтөбе Ж» Оралдың «Жайық» командасын қабылдады.
Алаң иелеріне кезекті үш ұпайды еншілеу үшін бір голдың өзі жеткілікті болды.
Командалар матчты бір-біріне айқын басымдық бермей бастады. Ойын негізінен тең дәрежедегі күреспен өтті. Дегенмен оралдықтар бірнеше рет шабуылдарын қауіпті сәтке дейін жеткізді. Кездесудің алғашқы бөлігінде көрермендер гол көре алмады.
Үзілістен кейін алаңдағы жағдай өзгерді. 53-минутта «Жайық» ойыншысының айып алаңында қолмен ойнағанынан кейін алаң иелері есеп ашуға мүмкіндік алды. Төреші бұл эпизодты ереже бұзушылық деп бағалап, пенальти белгіледі.
11 метрлік айып добын орындауды Адильбек Бегимов өз мойнына алды. Қонақтардың қақпашысы доптың бағытын дұрыс тапты, тіпті соққыдан кейін допқа қолын тигізді. Алайда голға тосқауыл бола алмады. «Ақтөбе Ж» алға шықты — 1:0.
Қалған уақытта есеп өзгерген жоқ. Қорытынды ысқырық «Ақтөбе Ж» командасына 1:0 есебіндегі жеңісті сыйлады.
Бірінші лига, 20-тур
«Ақтөбе Ж» — «Жайық» — 1:0
Гол: 53, Бегимов (пенальти)
Үш ұпай алған ақтөбелік команда турнирдегі ұпай санын 23-ке жеткізіп, оныншы орынға көтерілді. Ал 27 ұпайы бар «Жайық» чемпионатта алтыншы орында қала берді.