Араухо «Ливерпульге» ауысуға жақын
Фото: ESPN
«Барселонаның» қорғаушысы Рональд Араухо мансабын «Ливерпульде» жалғастыруы мүмкін. Бұл туралы танымал инсайдер Фабрицио Романо хабарлады.
Дереккөздің мәліметінше, ағылшын клубы 27 жастағы уругвайлық орталық қорғаушыны жалға алу бойынша каталондықтармен келісімге келген. Мәміле «Барселонаның» спорттық директоры Деку тарапынан мақұлданған, ал трансфер рәсімдеуінің соңғы кезеңінде тұр.
Романо бұл ықтимал ауысымды «күтпеген бомба» деп атап, бұған дейін тараптар арасында тек ауызша келісім болғанын, енді оның нақты іске асу сатысына өткенін жеткізді.
Араухо «Барселона» сапында 2018 жылдан бері өнер көрсетіп келеді және команданың қорғанысындағы негізгі ойыншылардың бірі саналады. Каталондық клуб құрамында ол үш рет Испания чемпионы атанып, ел Суперкубогын жеңіп алған, сондай-ақ екі мәрте Испания Кубогын иеленген.
Егер келісім толық аяқталса, қорғаушы жаңа маусым қарсаңында «Ливерпульдің» қорғаныс шебін күшейтпек.