«Арлан» «Алматыны» жеңді, бірақ Қазақстан кубогінің жартылай финалына шыға алмады
Фото: hcalmaty
Көкшетаулық «Арлан» шайбалы хоккейден Қазақстан кубогінің топтық кезеңін «Алматыны» 4:1 есебімен жеңіп аяқтады.
Көкшетау командасы матч тағдырын алғашқы кезеңнің өзінде-ақ шешіп қойды. Тамерлан Бейсембиев, Захар Захаров және Кирилл Эрфурт бір-бір шайбадан соғып, «Арланға» 3:0 есебімен басымдық әкелді.
Екінші кезеңде Игорь Ищенко есеп айырмасын арттырды. Ал алматылықтар тек Рахимбек Мейрманның голымен жауап бере алды. Үшінші кезеңде есеп өзгерген жоқ.
Қазақстан кубогі. Топтық кезең
«Арлан» — «Алматы» — 4:1
Кезеңдер бойынша: 3:0, 1:1, 0:0
Шайбалар: Бейсембиев, Захаров, Эрфурт, Ищенко — Мейрман.
Жеңіске қарамастан, «Арлан» турнирдің жартылай финалына шыға алмады. Төрт матчтан кейін көкшетаулық клуб төрт ұпай жинап, А тобында үшінші орын алды.
Ал «Алматы» топтық кезеңді ұпайсыз аяқтады.
