Асу Алмабаевтың жеңісі мен Льюис Хэмилтонның Қытай Гран-приіндегі триумфы: 19 қазан тарихта

Қазақстан

Асу Алмабаевтың жарқын жеңістері

2019 жыл. Қазақстандық ММА файтері Асу Алмабаев Астанада өткен M-1 Challenge 105 турнирінде канадалық Крис Келадесті төрешілердің бірауыздан шығарған шешімімен жеңді. Осы жеңістің арқасында ол M-1 Global ұйымының жеңіл салмақтағы уақытша чемпионы атанды. 2023 жылы «Зульфикар» әлемдегі ең ірі ММА ұйымы UFC-пен келісімшартқа отырды.

2024 жыл. Алмабаев UFC Fight Night 245 турнирінде бразилиялық Матеус Николауды төрешілердің бірауыздан шығарған шешімімен сенімді түрде жеңіп, жеңіл салмақтағы үздік он файтердің қатарына енді.

Әлем спорты

Автоспорттағы тарихи оқиғалар

1969 жыл. Австралиялық Дэнни Хьюм McLaren-Ford командасымен Мексика Гран-приінде жеңіске жетті. Екінші орынды бельгиялық Жаки Икс, үшінші орынды австралиялық Джек Брэбем иеленді. Жарыс Мехикодағы ағайынды Родригестер атындағы автодромда өтті.

1985 жыл. Британдық Найджел Мэнселл Williams-Honda командасымен Оңтүстік Африка Гран-приінде топ жарды. Екінші болып финляндиялық Кеке Росберг, үшінші болып француз Ален Прост мәреге жетті.

2008 жыл. «Формула-1» жарысының жеті дүркін чемпионы Льюис Хэмилтон McLaren командасымен Қытай Гран-приінде жеңіске жетті. Екінші орынды бразилиялық Фелипе Масса, үшінші орынды финляндиялық Кими Райкконен иеленді. Жарыс Шанхайдағы халықаралық автодромда өтті.

2025 жыл. Red Bull командасының нидерландылық пилоты Макс Ферстаппен АҚШ Гран-приінде жеңіске жетті. Британдық Ландо Норрис екінші, монегаск Шарль Леклер үшінші орын алды. Жарыс Техас штатындағы Остин қаласында өтті.

НХЛ тарихындағы маңызды белес

1957 жыл. Канадалық хоккейші Морис Ришар «Монреаль Канадиенс» сапында НХЛ тұрақты чемпионатындағы 500-голын соқты. Бұл «Чикаго Блэкхоксқа» қарсы кездесуде болды. «Монреаль» 3:1 есебімен жеңіске жетті. Ришар лига тарихында бұл межеге жеткен алғашқы хоккейші атанды.

Эдит Макгуайрдың Олимпиададағы триумфы

1964 жыл. Токиода өткен Олимпиадада америкалық жеңіл атлет Эдит Макгуайр 200 метрге жүгіруден алтын медаль жеңіп алып, 23 секунд нәтижесімен әлемдік рекорд орнатты. Ол Токио Олимпиадасында бір алтын және екі күміс медаль иеленді. Осылайша, бір Олимпиадада үш жүлде алған алғашқы афроамерикалық спортшылардың бірі болды.

Майкл Венденнің рекорды

1968 жыл. Америкалық жүзуші Майкл Венден Мехикода өткен Олимпиада ойындарында 100 метрге еркін стильде жүзуден алтын медаль жеңіп алды. Ол 52,2 секунд нәтижесімен Олимпиада рекордын орнатты.

«Баварияның» күтпеген жеңілісі

1993 жыл. Мюнхендік «Бавария» УЕФА кубогының екінші кезеңінде ағылшынның «Норвич Сити» клубына 1:2 есебімен есе жіберді. Голдарды Госс (12-минут), Боуэн (30-минут) және Нерлингер (41-минут) соқты. «Норвич Сити» ресми матчта «Баварияны» оның ескі «Олимпиаштадион» стадионында жеңген жалғыз британдық клуб ретінде тарихта қалды.

Костя Цзюдің ұлы титулдық жекпе-жекте жеңілді

2024 жыл. Ресейлік боксшы Бахрам Муртазалиев австралиялық Тим Цзюді үшінші раундта техникалық нокаутпен жеңіп, IBF нұсқасы бойынша бірінші орта салмақтағы әлем чемпионы атағын қорғап қалды. Жекпе-жек АҚШ-тың Флорида штатындағы Орландо қаласында өтті.

19 қазандағы әлем тарихындағы оқиғалар

Бұл күні Молдовада – заңгерлер күні, Ресейде – тамақ өнеркәсібі қызметкерлерінің күні, Арменияда зымыран-артиллерия әскерлерінің күні аталып өтеді.

1901 жыл. Бразилиялық өнертапқыш әрі ұшқыш Альберто Сантос-Дюмон ұзындығы 33 метрлік дирижабльмен Эйфель мұнарасын айналып ұшты.

1943 жыл. Америкалық микробиолог Альберт Шац Зельман Ваксманның жетекшілігімен стрептомицин антибиотигін бөліп алды. Бұл препарат туберкулезді емдеуде оң нәтиже көрсеткен алғашқы дәрілердің бірі болды.

2000 жыл. Нью-Йоркте әйгілі Мадам Тюссо балауыз мүсіндер музейінің филиалы ашылды. Онда шынайы адамдарға ұқсатып жасалған 200-ден астам мүсін ұсынылды.

19 қазанда дүниеге келген танымал спортшылар

1962 жыл. Эвандер Холифилд – америкалық боксшы. Ол бірінші ауыр және ауыр салмақ дәрежелерінде абсолютті әлем чемпионы атанған алғашқы боксшы болды.

1975 жыл. Хильде Герг – германиялық тау шаңғышысы. Әлем кубогының кезеңдерінде 20 рет жеңіске жеткен. 1998 жылы Наганода өткен Олимпиадада алтын және қола медаль иеленген.