Бақтияр Артаевтың «алтыны» және Вандерлей де Лимаға жасалған тағдырлы шабуыл: спорт тарихындағы бұл күн
ЖИ
29 тамыз спорт тарихында қазақстандық боксшы Бақтияр Артаевтың Афины Олимпиадасындағы алтын медалімен, Вандерлей де Лимаға жасалған күтпеген шабуылмен және Роза Мотаның Римдегі жеңісімен есте қалды.
Қазақстан:
2004 жыл – осы күні қазақстандық спортшылар Бақтияр Артаев пен Геннадий Лалиев Афины Олимпиадасында екі медаль жеңіп алды:
Боксшы Бақтияр Артаев (69 кг) алтын медаль иеленді. Финалда ол төрешілер шешімімен кубалық Лоренсо Арагонды жеңді. Сонымен қатар Артаев Василий Жировтан кейін Вэл Баркер кубогымен марапатталған екінші қазақстандық атанды.
Еркін күрес шебері Геннадий Лалиев Олимпиаданың күміс жүлдегері атанып, финалдық белдесуде ресейлік Бувайсар Сайтиевтен жеңілді.
Әлем:
Роза Мотаның тарихи жетістігі
1987 жыл – осы күні аты аңызға айналған португалиялық жеңіл атлет Роза Мота Римде өткен жеңіл атлетикадан әлем чемпионатында марафоннан (42 км) алтын медаль жеңіп алды. Оның нәтижесі – 2 сағат 25 минут 17 секунд.
Роза Мота – жеңіл атлетика тарихында Олимпиада чемпионы, әлем чемпионы және Еуропа чемпионы атақтарын бір уақытта иеленген жалғыз желаяқ.
Автоспорт тарихынан
2004 жыл – осы күні финляндиялық автокөлік жүргізушісі Кими Райкконен Бельгия Гран-приінде жеңіске жетті. Жарыста екінші орынға Ferrari-дің аты аңызға айналған неміс пилоты Михаэль Шумахер ие болды. Үздік үштікті Шумахердің командадағы серіктесі Рубенс Баррикелло түйіндеді. Жарыс Бельгияның Спа қаласындағы «Спа-Франкоршам» автодромында өтті.
Діни қызметкердің шабуылы Вандерлей де Лиманы «алтыннан» айырды
2004 жыл – осы күні бразилиялық жеңіл атлет Вандерлей де Лима Афины Олимпиадасында күтпеген шабуылдың құрбаны болды.
Ерлер арасындағы марафонның 35-шақырымында ақырзаман идеясына берілген діни қызметкер кенеттен жолға шығып, де Лиманы ұстап алып, көрермендер арасына сүйреп әкетті. Спортшыға шабуылдаушының қолынан босап шығуға грек жанкүйері Поливиос Коссивас көмектесті.
Бразилиялық спортшы қарсыластарынан айтарлықтай басымдықпен келе жатып, алтын медальға сенімді түрде бет алған еді. Алайда бірнеше секундқа созылған бұл оқиға оның жарысына кері әсер етті. Вандерлей де Лима Бразилия тарихындағы марафоннан алғашқы Олимпиада чемпионы атана алмады. Ол 2:12:11 нәтижесімен қола медаль жеңіп алды.
Лас-Вегастағы тартысты жекпе-жектер кеші
2020 жыл – осы күні Лас-Вегаста UFC Vegas 8 аралас жекпе-жек турнирі өтті.
Турнирдің басты жекпе-жегінде октагонға австралиялық Александр Ракич пен америкалық Энтони Смит шықты. Жартылай ауыр салмақтағы үш раундтық жекпе-жек Ракичтің төрешілердің бірауызды шешімімен жеңуімен аяқталды.
Кештің басты жекпе-жегінің алдында америкалық Нил Мэгни промоушеннің бұрынғы чемпионы Робби Лоулерді төрешілердің бірауызды шешімімен жеңді. Жартылай орта салмақтағы жекпе-жек үш раундқа созылды.
Бұл күні туғандар:
1983 жыл – Тимоти Брэдли, америкалық боксшы, екі салмақтағы бұрынғы әлем чемпионы.
1988 жыл – Жалғас Жұмағұлов, қазақстандық UFC-дің бұрынғы файтері, аса жеңіл салмақтағы Oktagon-ның қазіргі чемпионы.