«Барселона» президентінің қазасы, Сметовтың Риодағы күмісі және Әлидің нокауты: спорт тарихындағы бұл күн

Қазақстан:

Елдос Сметов пен Галбадрах Отгонцэцэг қазақстандық дзюдо тарихын жаңартты

2016 – дәл осы күні дзюдошылар Елдос Сметов (60 кг) және Галбадрах Отгонцэцэг (48 кг) Рио-де-Жанейрода өткен Олимпиада ойындарында Қазақстан құрамасының қоржынына екі жүлде салды:

Елдос Сметов Олимпиаданың күміс жүлдегері атанды. Финалда қазақстандық спортшы ресейлік Беслан Мудрановқа «вазари» есебімен жол берді. Елдос Сметов – Олимпиада ойындарының толық жүлде жиынтығын иеленген жалғыз қазақстандық дзюдошы:

• Рио-2016 – күміс;

• Токио-2020 – қола;

• Париж-2024 – алтын;

Галбадрах Отгонцэцэг қола медаль жеңіп алды. Ол шешуші белдесуде кубалық Даярис Местре Альваресті «иппон» әдісімен жеңді.

Демеу Жадраев Париж Олимпиадасында сенсация жасады

2024 – дәл осы күні грек-рим күресінен қазақстандық балуан Демеу Жадраев (77 кг) Париж Олимпиадасында үлкен сенсация тіркеді. Ширек финалда ол Токио Олимпиадасының күміс жүлдегері, екі дүркін әлем чемпионы Ақжол Махмудовты 3:1 есебімен жеңіп, жарыстың басты фавориттерінің бірін жарыс жолынан шығарды. Осылайша, Жадраев өз салмағындағы ең мықты балуандардың бірін алтын мен күміс үшін күрестен шеттетті.

Жартылай финалда қазақстандық спортшы әзербайжандық Санан Сулеймановты 6:1 есебімен айқын басымдықпен жеңді.

Әлем:

Жас қыздың Ла-Маншты бағындыруы

1926 – бұл күні америкалық жүзгіш Гертруда Эдерле тарихта алғаш рет Ла-Манш бұғазын жүзіп өткен әйел атанды. Ол суға түсер алдында денесіне қой майы мен ланолин қоспасын жағып, арнайы су өткізбейтін көзілдірік киген. Эдерле бұғазды 14 сағат 31 минутта жүзіп өтіп, ерлер арасындағы әлемдік рекордты 1 сағат 59 минутқа жаңартты. Жалпы қашықтық шамамен 56 шақырымды құрады. Айта кетерлігі, екі жыл бұрын ол Париж Олимпиадасының чемпионы атанған еді.

«Барселона» президентінің қайғылы қазасы

1936 – бұл күні «Барселона» клубының президенті, Каталония футбол федерациясының басшысы, «Каталонияның солшыл республикалықтары» партиясының өкілі Хосеп Суньоль франкистік күштер тарапынан атылды. Ол саяси және спорттық көзқарастары үшін генерал Франсиско Франко бастаған ұлтшылдардың басты нысаналарының бірі болған.

Азамат соғысы кезінде Суньоль республикалық әскерді қолдау мақсатында майдан шебіне барған. Ол сарбаздарға үгіт-насихат материалдары мен қаржы жеткізбек болған. Онымен бірге көлікте «Ла Рамбла» газетінің журналисі Пере дель Рио, жүргізуші және республикалық армия офицері Франсиско Ортега болған.

Сьерра-де-Гвадаррама тау жотасындағы асулардың бірінен өтіп бара жатқанда, олардың көлігі байқамай фашистер бақылауындағы аумаққа кіріп кеткен. Мұны аңғармаған Суньоль тоқтатқан әскери патрульді «Жасасын Республика!» деген ұранмен қарсы алған. Сол күні ол серіктерімен бірге ешқандай сотсыз жол жиегінде атылып кеткен. Қаза тапқандардың денелері табылмаған.

Мұхаммед Әлидің жойқын нокауты

1966 – дәл осы күні аңызға айналған америкалық суперауыр салмақтағы боксшы Мұхаммед Әли үшінші раундта британиялық Брайан Лондонды нокаутпен жеңді. Бұл жекпе-жекте «Ұлы» боксшы WBC, NYSAC және The Ring нұсқалары бойынша чемпиондық белбеулерін бесінші рет қорғады. Үшінші раундта Әли небәрі үш секунд ішінде қарсыласын 11 соққымен талқандап, өзінің ерекше шеберлігін тағы бір мәрте дәлелдеді. Осы кездесуден кейін Брайан Лондонның мансабы құлдырай бастады: ол келесі тоғыз жекпе-жектің алтауында жеңіліп, кейін спорттық мансабын аяқтады.

Автоспорт тарихынан

2006 – бұл күні британдық «Honda» командасының пилоты, болашақ «Формула-1» чемпионы Дженсон Баттон мансабындағы алғашқы жеңісіне қол жеткізді. Ол Будапештте өткен Венгрия Гран-приін ұтып алды. Екінші орынды «McLaren» командасының өкілі Педро де ла Роса иеленіп, карьерасындағы алғашқы әрі жалғыз подиумына шықты. Үздік үштікті «BMW Sauber» командасынан Ник Хайдфельд түйіндеді. Жарыс 4–6 тамыз аралығында Хунгароринг трассасында жаңбырлы ауа райында өтті.

Бұл күні туғандар:

Анатолий Быков – грек-рим күресінен кеңестік балуан, 1976 жылғы Монреаль Олимпиадасының чемпионы және 1980 жылғы Мәскеу Олимпиадасының күміс жүлдегері.

1992 – Хань Цун, қытайлық мәнерлеп сырғанаушы. Ол Суй Вэньцзинмен жұптасып өнер көрсетеді. Қос спортшы – 2022 жылғы Бейжің Олимпиадасының чемпиондары, 2018 жылғы Пхёнчхан Олимпиадасының күміс жүлдегерлері, сондай-ақ екі дүркін әлем чемпиондары (Хельсинки-2017, Сайтама-2019).