Бастонидің алаңнан қуылуы «Интердің» жеңісіне кедергі болмады
Италияның «Интер» клубы УЕФА Чемпиондар лигасының жалпы кезеңіндегі үшінші турда өз алаңында Украинаның «Шахтер» командасын 1:0 есебімен жеңіп, турнирдегі алғашқы жеңісіне қол жеткізді.
УЕФА Чемпиондар лигасы. Жалпы кезең. 3-тур
«Интер» (Италия) – «Шахтер» (Украина) – 1:0 (0:0)
Гол: Карлос Аугусто, 77.
Алаңнан қуылды: Алессандро Бастони, 68 («Интер»).
Бірінші таймда екі команда да қауіпті шабуылдар ұйымдастырғанымен, есеп ашылған жоқ. Матчтағы маңызды сәттердің бірі 68-минутта болды. «Интердің» қорғаушысы Алессандро Бастони Олег Очеретькоға қарсы ереже бұзып, екінші сары қағазын алды. Нәтижесінде миландық клуб алаңда бір ойыншыға кем қалды.
Сан жағынан басымдық қарсыласына өткенімен, «Интер» есеп ашудың жолын тапты. 77-минутта Генрих Мхитарян айып алаңына пас беріп, Карлос Аугусто дәл соққысымен допты «Шахтердің» қақпасына тоғытты.
Көп ұзамай украиналық команда есепті теңестіруге мүмкіндік алды. 79-минутта Невертон «Интердің» қақпасын дәл көздегенімен, гол офсайдқа байланысты есепке алынбады.
Бұл жеңістен кейін «Интер» турнирдегі алғашқы үш ұпайына қол жеткізді. Бұған дейін Кристиан Киву бастаған команда Мадридтің «Реалына» (1:2) және Бельгияның «Брюгге» клубына (3:4) есе жіберген еді. Ал «Шахтердің» үш турдан кейін төрт ұпайы бар.
Төртінші турда, 3 қарашада, «Интер» сырт алаңда Нидерландтың «Фейеноорд» клубымен кездеседі. Ал Донецктің «Шахтері» Португалияның «Спортинг» командасымен ойнайды.