Бекзад Нұрдәулетовтің кәсіпқой бокстағы дебюті мен Александр Усиктің Лондондағы жеңісі: 31 қазан тарихта

Қазақстан:

Бекзад Нұрдәулетовтің кәсіпқой бокстағы дебюті

2020 жыл – дәл осы күні қазақстандық боксшы Бекзад Нұрдәулетов Атырауда өткен бокс кешінде танзаниялық Ибрагим Маоколаны екінші раундта техникалық нокаутпен жеңді. Жартылай ауыр салмақта өткен жекпе-жек әлем чемпионы Нұрдәулетов үшін кәсіпқой рингтегі алғашқы кездесу болды.

Әлем:

Лондондағы Олимпиада ойындарының аяқталуы

1908 жыл – осы күні Лондонда IV жазғы Олимпиада ойындары аяқталды. Жарысқа 2000-нан астам спортшы қатысып, 22 спорт түрінен 110 медаль жиынтығы сарапқа салынды. Жалпыкомандалық есепте Ұлыбритания, АҚШ және Швеция құрамалары үздік үштікке енді.

Лондон Олимпиадасы бірнеше тарихи жаңалығымен есте қалды:

- Олимпиада ойындарында алғаш рет елдер шеруі ұйымдастырылды;

- Марафон қашықтығы 42 шақырым 195 метр болып бекітілді;

- Олимпиадаға арнап алғашқы көпфункционалды «Уайт-Сити» стадионы салынды;

- Италиялық желаяқ Дорандо Пьетридің жеңіске деген жігері көпшілікті таңғалдырды. Марафонның мәресіне жақындағанда спортшы бірнеше рет құлап, бағытынан жаңылған. Төрешілердің көмегімен орнынан тұрған Пьетри мәреге бірінші болып жеткенімен, келесі күні америкалық команданың шағымынан кейін жарыс ережесін бұзғаны үшін дисквалификацияланды.

НБА-да алғаш рет афроамерикалық баскетболшы өнер көрсетті

1950 жыл – осы күні Эрл Ллойд НБА тарихында матчқа қатысқан алғашқы афроамерикалық баскетболшы атанды. Оның «Вашингтон Кэпитолс» командасы тұрақты чемпионаттағы алғашқы кездесуінде «Рочестер Роялздан» (қазіргі «Сакраменто Кингз») 70:78 есебімен жеңілді. 2003 жылы Эрл Ллойд баскетбол Даңқ залына енгізілді.

Леннокс Льюистің жеңісі

1992 жыл – британдық боксшы Леннокс Льюис Лондонда өткен жекпе-жекте канадалық Донован Раддокты екінші раундта техникалық нокаутпен жеңді. Осы жеңісінің арқасында ол WBC нұсқасы бойынша ауыр салмақтағы әлем чемпионы атағы үшін жұдырықтасу мүмкіндігіне ие болды.

Автоспорт тарихынан

1999 жыл – финляндиялық Мика Хаккинен «Макларен-Мерседес» командасының құрамында Жапония Гран-приін жеңіп алды. «Сузука» автодромында өткен жарыста екінші орынды германиялық Михаэль Шумахер, ал үшінші орынды солтүстік ирландиялық Эдди Ирвайн иеленді. Бұл Формула-1-дің 1990-жылдардағы ең табысты пилоттарының бірі Деймон Хиллдің мансабындағы соңғы Гран-приі болды.

Александр Усиктің Лондондағы жеңісі

2020 жыл – украиналық боксшы Александр Усик Лондондағы «Уэмбли Аренада» өткен жекпе-жекте британдық Дерек Чисораны төрешілердің бірауыздан шығарған шешімімен жеңді. Осылайша, ол ауыр салмақтағы WBO Inter-Continental чемпиондық белбеуін иеленді. Бұл Усиктің аса ауыр салмақтағы алғашқы жекпе-жектерінің бірі еді.

Ал 2024 жылы Тайсон Фьюриді жеңгеннен кейін Усик XXI ғасырда аса ауыр салмақта абсолютті әлем чемпионы атанған алғашқы боксшы болды.

Александр Зверевтің Венадағы триумфы

2021 жыл – германиялық теннисші Александр Зверев Австрия астанасында өткен ATP 500 санатындағы турнирдің жеңімпазы атанды. Финалда ол америкалық Фрэнсис Тиафоны 7:5, 6:4 есебімен ұтып, мансабындағы 18-ші титулына қол жеткізді.

31 қазанда әлем тарихында болған оқиғалар:

- 1892 жыл – ағылшын жазушысы Артур Конан Дойлдың «Шерлок Холмстың бастан кешкен оқиғалары» атты кітабы жарық көрді.

- 2011 жыл – БҰҰ Халық қоныстандыру қорының есептеуінше, Жер шарындағы халық саны 7 миллиардқа жетті.

- 2018 жыл – Үндістанда әлемдегі ең биік мүсін – Бірлік мүсіні ашылды.

Осы күні дүниеге келгендер:

- 1958 жыл – Жанни Лонго, француз велошабандозы, Олимпиада ойындарының бірнеше дүркін жүлдегері. Оның қоржынында Атланта Олимпиадасының алтыны, Барселона мен Атланта ойындарының күмісі және Сидней Олимпиадасының қоласы бар.

- 1985 жыл – Сергей Деревянченко, украиналық боксшы. Ол орта және екінші орта салмақ дәрежелерінде өнер көрсеткен. 2019 жылы қазақстандық Геннадий Головкинмен жұдырықтасқан. 2007 жылғы әлем чемпионатының қола жүлдегері.