«Біз әлем чемпионы атана аламыз». Пулишич Бельгиямен матч алдында батыл мәлімдеме жасады

Команда капитаны Кристиан Пулишич америкалық футболшылардың жеткен жетістігімен тоқтап қалмайтынын және әлем чемпионы атануға әлі де сенетінін айтты.

«Милан» клубының жартылай қорғаушысы алдағы қарсыластың деңгейіне қарамастан, команда ішінде өз күшіне деген сенімнің жоғары екенін атап өтті.

«Біз – америкалықтармыз және әрдайым өз мүмкіндігімізге сенеміз. Біз бұл жерге жай ғана қатысу үшін емес, чемпиондыққа таласу үшін келдік. Әлем чемпионатын жеңе алатынымызға кәміл сенеміз. Жанкүйерлер де бізбен бірге осы сенімді бөліседі деп үміттенемін», – деді Пулишич.

АҚШ құрамасының шабуылшысы Фоларин Балогунның қатарға қайта қосылуы да команда үшін жағымды жаңалық болды.

Пулишичтің айтуынша, бұл жағдай бүкіл ұжымның көңіл күйіне оң әсер еткен.

«Фоларин үшін шын жүректен қуаныштымыз. Оның реакциясын көрсеңіз, бұл жаңалықтың өзі үшін қаншалықты маңызды екенін бірден түсінесіз. Ол мұндай матчта ойнауға лайық. Оның қайта оралуы бүкіл командаға қосымша сенім сыйлады», – деді капитан.

Айта кетейік, Босния және Герцеговинаға қарсы өткен алдыңғы матчта Балогун қызыл қағаз алып, бір ойынға автоматты түрде шеттетілген еді. Алайда кейін ФИФА-ның тәртіптік органдары бұл шешімді қайта қарап, жазаның күшін уақытша тоқтатты. Соның нәтижесінде шабуылшы Бельгияға қарсы маңызды кездесуге қатысу мүмкіндігіне ие болды.