«Ертіс» Нұрбол Жұмасқалиевтің тағайындалғанын ресми түрде жариялады
Нұрбол Жұмасқалиев
«Ертіс» футбол клубы қазақстандық маман Нұрбол Жұмасқалиевтің бас бапкер қызметіне тағайындалғаны туралы ресми түрде хабарлады.
45 жастағы Нұрбол Жұмасқалиевпен жасалған келісімнің толық мәліметтері әзірге жарияланған жоқ.
Жұмасқалиев Қазақстан чемпионаты тарихында ең көп матчқа қатысып, рекорд жасаған футболшы — 526 ойын. Сонымен қатар ол 167 голмен ел біріншілігі тарихындағы ең үздік сұрмерген. Мансабының басым бөлігін қостанайлық «Тобол» сапында өткізген футболшы 2017 жылы павлодарлық «Ертіс» клубының да намысын қорғаған.
Оның жетістіктер тізімінде Қазақстан чемпионы атағы, ел Кубогы мен Суперкубогы, сондай-ақ Интертото кубогындағы триумф бар. Оған қоса, Нұрбол Жұмасқалиев Қазақстан құрамасы тарихындағы ең көп матч өткізіп, ең көп гол соққан ойыншылардың үздік ондығына кіреді.
Футболшылық мансабын аяқтағаннан кейін Жұмасқалиев «Тобол» клубының құрылымында жұмысын жалғастырды. 2018 жылдан бастап ол клубтың жаттықтырушылар штабында және басшылық құрамда түрлі қызметтер атқарды, оның ішінде спорт директоры лауазымы да бар. «Ертіске» келгенге дейін маман қостанайлық клубтың бас бапкері қызметін атқарды.
Сондай-ақ Жұмасқалиев Қазақстанның ұлттық және жастар құрамаларында бапкерлік штабта жұмыс істеп, бас бапкердің көмекшісі болған.
Жаңа клубта Нұрбол Жұмасқалиевтің көмекшілері ретінде Данияр Мұқанов пен Олег Недашковский қызмет атқаратыны хабарланды.