Франция Бельгияны ойсырата жеңді

«Стад де Франс» стадионындағы кездесу алаң иелері үшін сәтсіз басталды. 35-минутта Доди Лукебакио Бельгияны алға шығарды. Француздар допқа көбірек иелік еткенімен, үзіліске дейін қарсыластың қорғанысын бұза алмады.

Ойынның бетбұрысы екінші таймда болды.

77-минутта алаңға қосалқы құрамнан шыққан Дезире Дуэ есепті теңестірді. Арада төрт минут өткенде Райан Шерки Францияны алға шығарды. Осыдан кейін бельгиялықтар ойын тізгінін толық жоғалтты. Ал матч соңындағы басты қаһарман Майкл Олисе атанды. «Бавария» футболшысы 88 және 90+1-минуттарда гол соғып, дубль жасады.

Осылайша, Франция қысқа уақыттың ішінде 0:1 есебіндегі жеңілісті 4:1 есебіндегі ірі жеңіске айналдырды.

УЕФА Ұлттар лигасы-2026/27. А лигасы. 1-топ

Франция – Бельгия – 4:1

Голдар: Дезире Дуэ, 77; Райан Шерки, 81; Майкл Олисе, 88, 90+1 – Доди Лукебакио, 35.

Осылайша, төрт турдан кейін Зидан шәкірттері жеңіліссіз келеді: үш жеңіс және бір тең нәтиже. Франция 10 ұпай жинап, А1 тобындағы көшбасшылығын сақтап қалды.

Зидан тұсындағы команданың қалай өзгеріп келе жатқанын қазіргі нәтижелерден де байқауға болады. Алғашқы екі кездесуде француздарға бір-бір гол жеткілікті болды. Әуелі олар Түркияны минималды есеппен жеңсе, кейін Брюссельде Бельгияны Олисенің 88-минуттағы голының арқасында ұтты.

Франция алғашқы ұпайларын 2 қазанда Италияға қарсы матчта жоғалтты. Олисе 55-минутта есеп ашқанымен, Алессандро Бастони итальяндықтарға есепті теңестіруге көмектесті – 1:1. Француздар кездесудің соңын Дайо Упамекано алаңнан қуылғаннан кейін 10 ойыншымен өткізді.

Ал үш күннен кейін Франция Ұлттар лигасындағы осы маусымдағы ең нәтижелі матчын өткізді. Бельгия қақпасына төрт гол соғылып, олардың барлығы 76-минуттан кейін салынды.

Төрт турдан кейін Францияда 10 ұпай, Италияда – 7, Бельгияда – 6 ұпай бар. Түркия әзірге ұпай жинай алған жоқ.

Қараша айында Франция топтық кезеңдегі соңғы екі матчын өткізеді. 12 қарашада Зидан шәкірттері Италияға қонаққа барса, 15 қарашада Түркияны өз алаңында қабылдайды.