Франциядағы тәртіпсіздіктерге байланысты «Галатасарай» УЕФА-ға жүгінбек
Фото: Getty Images
Түркиялық «Галатасарай» Чемпиондар лигасының жалпы кезеңіндегі «Лилльге» қарсы сырт алаңдағы матч алдында Франциядағы жағдайға алаңдап отыр. Елде жаппай наразылықтар болып жатқандықтан, клуб футболшылар мен жанкүйерлердің қауіпсіздігіне қатысты алаңдаушылық білдірді.
Dogan басылымының мәліметінше, Ыстанбұл клубының басшылығы 21 қазанға жоспарланған кездесудің алдында қауіпсіздік шараларын күшейтуді сұрап, Еуропалық футбол қауымдастықтары одағына (УЕФА) ресми өтініш дайындап жатыр.
Матч Францияның Вильнёв-д'Аск қаласындағы «Декатлон Арена – Пьер-Моруа» стадионында өтеді. Бұл нысан Лилль қаласына жақын орналасқан.
«Галатасарай» кездесуді басқа елге немесе басқа стадионға көшіруді талап етіп отырған жоқ. Клуб үшін ең маңыздысы – команданың Францияға қауіпсіз жетуі, елде болған кезінде қауіпсіздігінің қамтамасыз етілуі және жанкүйерлердің стадионға тәртіппен кіруі.
Түркиялық клуб өкілдері Франция елшілігімен және Түркия Сыртқы істер министрлігімен байланыс орнатқан.
Францияда не болып жатыр?
Алаңдаушылыққа соңғы күндері полициямен қақтығыстарға, көліктердің өртенуіне және дүкендердің тоналуына ұласқан жаппай наразылықтар себеп болған.
Наразылықтар білім беру жағдайына, мемлекеттік қызметтердің сапасына және өмір сүру құнының өсуіне қатысты халықтың наразылығынан туындаған. Әсіресе Парижде жағдай күрделеніп, тәртіпсіздікке қатысушылар көліктерді өртеп, көшелерде баррикадалар тұрғызған.
Француз БАҚ-тарының хабарлауынша, өткен демалыс күндері құқық қорғау органдары шамамен 2400 адамды ұстаған. Билік полиция санын көбейтіп, астананың кейбір аудандарында шектеулер енгізуге мәжбүр болған.
Атап айтқанда, Париждегі Республика алаңы мен Ле-Аль аудандарында түнгі коменданттық сағат жарияланған. Қосымша қауіпсіздік шаралары Лилльді қоса алғанда, басқа қалаларда да қолға алынған.
Осындай жағдайда ірі спорттық іс-шараларды ұйымдастырушылар командалар мен көрермендердің қауіпсіздігіне ерекше көңіл бөлуге мәжбүр. «Пари Сен-Жермен» мен «Барселона» арасындағы кездесу алдында да қауіпсіздік мәселесі туындап отыр.
Айта кетейік, екі команда да алдыңғы турда сәтсіз өнер көрсетті.
13 қазанда «Галатасарай» өз алаңында испаниялық «Барселонадан» 1:4 есебімен жеңіліп қалды. Түркиялық клуб каталондықтардың шабуылына төтеп бере алмай, ұпайсыз қалды.
«Лилль» де ірі есеппен жеңілді. Франциялық команда Лондонда «Арсеналға» 0:3 есебімен есе жіберді.
Екі турдан кейін қос команда да ұпай жинай алмады. Сондықтан алдағы кездесу олар үшін ерекше маңызға ие. Дегенмен матч алдында спорттық нәтижелерден гөрі қауіпсіздік мәселесі бірінші орынға шығып отыр.
«Лилль» мен «Галатасарай» арасындағы ойын 21 қазанда өтеді. Әзірге УЕФА кездесудің өтетін орнын өзгерту туралы ресми шешім қабылдаған жоқ.