Головкиннің Ұлыбританиядағы дебюті және Италия Гран-приіндегі қайғылы оқиға: 10 қыркүйек – спорт тарихында

Қазақстан:

GGG-дің Ұлыбританиядағы алғашқы жекпе-жегі

2016 – осы күні сол кезде WBC, WBA, IBF және IBO нұсқалары бойынша орта салмақтағы әлем чемпионы болған қазақстандық аты аңызға айналған боксшы Геннадий Головкин британдық Келл Брукты бесінші раундта техникалық нокаутпен жеңді.

Осы жеңістің арқасында Головкин WBC, IBF және IBO нұсқаларындағы үш чемпиондық белбеуін қорғап қалды. Ал WBA титулы бұл жекпе-жекте сарапқа салынған жоқ. Себебі аталған ұйым өкілдері Бруктың қазақстандық боксшымен жекпе-жек өткізу үшін бірден екі салмақ дәрежесіне жоғары көтерілгенін құптамаған.

Бұл Геннадий Головкиннің кәсіби рингтегі Ұлыбританияда өткен алғашқы ресми жекпе-жегі болды.

Максим Самородов Қазақстан құрамасына жеңіс сыйлады

2023 – осы күні Қазақстан ұлттық құрамасы футболдан 2024 жылғы Еуропа чемпионатының іріктеу кезеңіндегі матчта Солтүстік Ирландияны 1:0 есебімен жеңді.

Кездесудегі жалғыз голды 27-минутта шабуылшы Максим Самородов соқты. Бұл командалар арасындағы екінші матч еді. Бірнеше ай бұрын Қазақстан құрамасы Белфасттағы «Уиндзор Парк» стадионында өткен сырт алаңдағы ойында да солтүстік ирландиялықтарды 1:0 есебімен жеңген болатын.

Әлем:

Мұхаммед Әлидің жарқын жеңісі

1966 – осы күні атақты америкалық боксшы Мұхаммед Әли Франкфуртте өткен жекпе-жекте германиялық Карл Мильденбергерді 12-раундта техникалық нокаутпен жеңді.

Бұл жеңіс «Ұлының» WBC нұсқасы бойынша ауыр салмақтағы чемпиондық белбеуін қатарынан алтыншы рет қорғауына мүмкіндік берді.

Мұхаммед Әли мен Карл Мильденбергер арасындағы жекпе-жек спутник арқылы түрлі-түсті форматта тікелей эфирде көрсетілген алғашқы спорттық оқиға болды.

Винус Уильямс – US Open чемпионы

2000 – осы күні америкалық теннисші Винус Уильямс (Серена Уильямстың әпкесі) АҚШ ашық чемпионаты – US Open турнирінің жеңімпазы атанды.

Финалда ол отандасы Линдсей Дэвенпортты 6:4, 7:5 есебімен жеңді. Қызығы, Винустың әпкесі Серена ширек финалда Дэвенпорттан жеңіліп, турнирдің қазіргі чемпионы атағын қорғай алмады. Осылайша Винус US Open финалында Дэвенпортты жеңіп, әпкесінің жеңілісі үшін «кек қайтарды».

Михаэль Шумахердің триумфы және Италия Гран-приіндегі қайғылы оқиға

2000 – осы күні Ferrari командасының неміс пилоты Михаэль Шумахер Италия Гран-приінде жеңіске жетті. Екінші және үшінші орындарды финляндиялық Мика Хаккинен (McLaren-Mercedes) мен Михаэль Шумахердің інісі Ральф Шумахер (Williams-BMW) иеленді.

Бұл Михаэль Шумахердің мансабындағы 41-жеңісі болды. Алайда Италия Гран-приі Шумахердің жеңісімен ғана тарихта қалған жоқ.

Жарыс кезінде Ярно Трулли, Хайнц-Харальд Френтцен, Рубенс Баррикелло, Дэвид Култхард және Педро де ла Роса мінген болидтер арасында апат болды. Жүргізушілер зардап шеккен жоқ. Алайда Френтценнің көлігінен ажыраған алдыңғы оң жақ дөңгелек қоршаудан асып ұшып, трассадағы өрт сөндіруші-волонтер Паоло Джислимбертидің кеудесі мен басына тиген.

Алған жарақатынан ол ауруханада көз жұмды. Бұл 1994 жылдан бергі Формула-1 жарыстарындағы адамның қаза табуымен аяқталған екінші оқиға болды. Сол жылы Сан-Марино Гран-приінде Формула-1-дің үш дүркін чемпионы Айртон Сенна қаза тапқан еді.

Бұл күні дүниеге келгендер:

1929 – Арнольд Палмер, атақты америкалық гольфшы, актер, бизнесмен және тележүргізуші. «Мейджор» сериясының жеті дүркін чемпионы. Палмер 2016 жылы 87 жасында қайтыс болды.

1976 – Густаво Куэртен, бразилиялық теннисші, әлемнің бұрынғы бірінші ракеткасы. Жекелей сында Франция ашық чемпионатының үш дүркін жеңімпазы (1997, 2000, 2001).

1978 – Рамунас Шишкаускас, литвалық баскетболшы, 2000 жылы Сиднейде өткен Олимпиада ойындарының қола жүлдегері.