J-тобы: Аргентина, Алжир, Австрия, Иордания

Аргентина құрамасы ФИФА рейтингіндегі орны: 1

Әлем чемпионаттарындағы ең үздік нәтижесі: чемпион (1978, 1986, 2022)

Бас бапкері: Лионель Скалони

Әлем чемпионатының қазіргі жеңімпазы, үш рет әлем біріншілігін ұтқан. ФИФА рейтингінің көшбасшысы. Құрамында «Алтын доптың» сегіз дүркін иегері – футбол тарихындағы ең ұлы ойыншылардың бірі Лионель Месси ойнайтын команда. Осы фактілердің өзі-ақ Аргентина құрамасының тек топтың сөзсіз фавориті ғана емес, сонымен қатар турнир жеңімпаздығына басты үміткер екенін көрсетеді.

«Альбиселесте» ӘЧ-2026 финалдық кезеңіне еш қиындықсыз өтті және жеребе нәтижесінде олар өте әлсіз қарсыластары бар топқа түсті. Барлық қарсыластары үш дүркін әлем чемпионынан деңгейі жағынан да, беделі жағынан да төмен. Дегенмен, өткен әлем чемпионаты Аргентина үшін Сауд Арабиясынан сенсациялық жеңіліспен басталғанын ұмытпау керек. Сонымен қатар, олардың басты жұлдызы Лионель Месси осы турнир барысында 39 жасқа толады.

Тағы бір маңызды фактор – статистика бойынша соңғы 60 жылдан астам уақытта ешбір құрама әлем чемпионатын қатарынан екі рет жеңіп көрмеген. Тарихта мұны тек екі команда ғана істеген: 1938 жылы Италия және 1962 жылы Бразилия.

Сондықтан Аргентинаға бұл қиын дәстүрді бұзу өте ауыр болмақ, ал Месси үшін жас факторымен күресу оңай емес. Бірақ жанкүйерлер бұған қарамастан тек жеңісті күтеді. Өйткені командада тек Месси ғана емес, жоғары деңгейлі басқа да ойыншылар бар: Эмилиано Мартинес, Науэль Молина, Алексис Мак Аллистер, Хулиан Альварес, Лаутаро Мартинес – Еуропаның үздік клубтарында ойнайтын жоғары деңгейлі футболшылар.

Команданы сегіз жылдан бері Лионель Скалони басқарады. Ол 36 жылдан кейін Аргентинаға әлем чемпионы атағын қайтарды (2022, Катар). Жалпы алғанда, Аргентина топта бірінші орын алуға толық негіз бар. Ал плей-оффтың алғашқы кезеңінде олар Н тобының екінші командасымен кездеседі. Ол жерде Уругвай немесе Испания түсуі мүмкін.

Алжир құрамасы

ФИФА рейтингіндегі орны: 28

Әлем чемпионаттарындағы ең үздік нәтижесі: 1/8 финал (2014)

Бас бапкері: Владимир Петкович (Швейцария)

Алжир үшін бұл бесінші әлем чемпионаты, бірақ 2014 жылдан кейінгі алғашқысы. Сол жылы Бразилиядағы турнирде «шөл түлкілері» өз тарихындағы ең үздік нәтижесін көрсетті.

Топтық кезеңде олар Ресей мен Оңтүстік Кореяны артта қалдырып, Бельгиядан кейін екінші орын алған. Ал 1/8 финалда Германияға қосымша уақытта ғана (1:2) есе жіберді.Алайда кейін құрамда буын алмасу болып, нәтижелер нашарлады. Соңғы 10 жылдан аса уақытта тек бір үлкен жетістік болды – 2019 жылғы Африка Ұлттар кубогындағы жеңіс.

Осы кезеңде Рияд Марез, Исмаэль Беннасер, Рами Бенсебаини сияқты талантты ойыншылар болды. Бірақ олардың бар болғанына қарамастан, команда әлем чемпионаттарына (2018, 2022) өте алмады.Бас бапкер Владимир Петкович тәжірибелі маман, бірақ әзірге үлкен нәтиже көрсете алған жоқ. Оның ең үздік жетістігі Швейцариямен бірге Еуро-2020 ширек финалы. Алжирге Аргентинамен және тіпті Австриямен бәсекелесу өте қиын болмақ. Бірақ үшінші орын алып, плей-оффқа жолдама алуға үміт бар.

Австрия құрамасы

ФИФА рейтингіндегі орны: 24

Әлем чемпионаттарындағы ең үздік нәтижесі: 3-орын (1954)

Бас бапкері: Ральф Рангник (Германия)

Австрия XXI ғасырда алғаш рет әлем чемпионатына қатысады. Олар 1998 жылдан бері бірде-бір мундиальға өте алмаған. Бұрын Австрия футболы өте мықты болған: 1934 жылы 4-орын, 1954 жылы 3-орын алған.

Содан бері олар плей-оффқа да өте алмай келеді. Бірақ соңғы жылдары Еуро-2020 және Еуро-2024 жарыстарында топтан шықты. Команданы Ральф Рангник басқарады. Құрамда Конрад Лаймер, Марсель Забитцер, Ксавер Шлагер, Кевин Дансо, Давид Алаба сияқты тәжірибелі ойыншылар бар.Австрия топта екінші орынға таласуы мүмкін. Бірақ плей-оффта Уругвай немесе Испания сияқты қарсыластар түсуі ықтимал, сондықтан жолы қиын болады.  

 Иордания құрамасы

ФИФА рейтингіндегі орны: 63

 Әлем чемпионатындағы дебюті

Бас бапкері: Жамаль Селлами (Марокко)

Иордания – әлем чемпионатына алғаш рет қатысып отырған үш команданың бірі. ӘЧ-2026-ға шығудың өзі бұл ел үшін үлкен жетістік. Бірақ топта Аргентина сияқты чемпионмен ойнау олар үшін өте қиын.

Құрам негізінен тәжірибелі, бірақ шетелде ойнайтын жұлдыздары аз. Ерекше ойыншы – Францияның «Ренн» клубындағы Мұса Әл-Тамари. Бас бапкер Жамаль Селлами 1998 жылғы әлем чемпионатына қатысқан, бірақ ол кезде тек бір матчта 3 минут қана ойнаған. Иордания бұл топтың айқын аутсайдері саналады. Плей-оффқа шығу үшін үлкен сенсация қажет.

J тобының матч кестесі:

• Аргентина – Алжир. 17 маусым, 06:00

• Австрия – Иордания. 17 маусым, 09:00

• Аргентина – Австрия. 22 маусым, 22:00

• Иордания – Алжир. 23 маусым, 08:00

• Иордания – Аргентина. 28 маусым, 07:00

• Алжир – Австрия. 28 маусым, 07:00

Қазақстан уақыты бойынша.