Камару Усман Хамзат Чимаевқа жаңа қарсылас таңдап берді
Хамзат Чимаев
UFC ұйымының экс-чемпионы, нигериялық файтер Камару Усман жақында алғаш рет жеңіліске ұшыраған Хамзат Чимаевтың келесі жекпе-жегі бразилиялық Пауло Костаға қарсы өтуі керек деп есептейді.
«Пауло Костаның [Азамат Мурзакановқа қарсы жекпе-жекте] қандай деңгейде өнер көрсеткенін еске алайық. Бұл айқас — нағыз жарылысқа айналды! Шын мәнінде өте қауіпті файтер. Біз Пауло Костаны құлатып, партерде ұстап тұру қаншалықты қиын екенін жақсы білеміз. Бұл — бомба», — деді Усман Pound 4 Pound with Kamaru & Henry подкастында.
Пауло Коста соңғы жекпе-жегін сәуір айында АҚШ-тың Майами қаласындағы UFC 327 турнирінде өткізді. Бұл кездесуде ол ресейлік Азамат Мурзакановты техникалық нокаутпен жеңіп, жартылай ауыр салмақта (93 келіге дейін) сәтті дебют жасады.