Макс Ферстаппеннің рекордтық жеңісі және Франциядағы алғашқы UFC турнирі: спорт тарихында 3 қыркүйек

Серена Уильямстың тарихи рекорды

2016 жыл – осы күні америкалық аты аңызға айналған теннисші Серена Уильямс «Үлкен дулыға» турнирлеріндегі жеңістер саны бойынша рекорд орнатты. АҚШ ашық чемпионатының 1/16 финалында Уильямс швециялық Юханна Ларссонды 6:2, 6:1 есебімен ойсырата жеңді. Бұл Серенаның «Үлкен дулыға» турнирлеріндегі 307-ші жеңісі болды. Осы көрсеткіш бойынша ол бұған дейінгі рекорд иесі Мартина Навратилованы басып озды. Навратилова «Үлкен дулыға» додаларында 306 матчта жеңіске жеткен.

Франциядағы алғашқы UFC турнирі

2022 жыл – осы күні француз ММА файтері Сирил Ган Парижде өткен UFC Fight Night 209 турнирінің басты жекпе-жегінде австралиялық Тай Туивасаны үшінші раундта техникалық нокаутпен жеңді. Ауыр салмақтағы бұл айқас кештің басты оқиғасы болды.

Бұл Франция аумағында өткен алғашқы UFC турнирі еді. Бұған дейін елде тордағы жекпе-жектерге заң бойынша тыйым салынған болатын.

Макс Ферстаппеннің рекорды

2023 жыл – осы күні нидерландылық Red Bull командасының пилоты Макс Ферстаппен Италия Гран-приінде жеңіске жетті. Екінші орынға оның командаласы, мексикалық Серхио Перес жайғасса, үздік үштікті Ferrari өкілі, испаниялық Карлос Сайнс-младший түйіндеді.

Осы жеңіс Ферстаппен үшін қатарынан оныншы жеңіс болды. Осылайша ол Формула-1 тарихындағы жаңа рекордты орнатты. Бұған дейінгі рекорд Себастьян Феттельге тиесілі еді. Неміс пилоты 2013 жылы қатарынан тоғыз жарыста жеңіске жеткен.

Бұл күні дүниеге келгендер:

1939 жыл – Владимир Бакулин, кеңестік және қазақстандық грек-рим күресінің шебері, 1967 жылғы әлем чемпионы. Ол Қазақ КСР тарихында осы спорт түрінен Олимпиада медалін жеңіп алған алғашқы балуан атанды. 1968 жылы Мехикода өткен Олимпиада ойындарында Бакулин 52 келіге дейінгі салмақта күміс медаль иеленді. Атақты балуан 2012 жылдың желтоқсанында дүниеден өтті.

1986 жыл – Ақжүрек Таңатаров, қазақстандық еркін күрес шебері, 2012 жылы Лондонда өткен Олимпиада ойындарының қола жүлдегері.