Максим Самородов Фарер аралдары мен Словакияға қарсы матчтарға қатыса алмайды
Фото: Getty Images
Қазақстан құрамасы УЕФА Ұлттар лигасындағы алғашқы матчтары алдында тағы бір футболшысынан айырылды.
Алдағы кездесулерде Грозныйдың «Ахмат» клубының шабуылшысы Максим Самородов ұлттық құрамаға көмектесе алмайды.
Қазақстан футбол федерациясының хабарлауынша, 24 жастағы шабуылшы жарақат алған. Осыған байланысты ол турнирдегі алғашқы екі матчты – Фарер аралдары мен Словакияға қарсы кездесулерді өткізіп алады.
Самородовтың ұлттық құрама сапына қашан оралатыны әзірге белгісіз. Ұлттар лигасының алғашқы сырт алаңдағы ойындарынан кейін Қазақстан құрамасы өз алаңында тағы екі матч өткізеді. Қарсыластар – Молдова мен Фарер аралдары.
ҚФФ мәліметінше, футболшының жағдайы динамикада бағаланады. Ұлттық құраманың медициналық штабы шабуылшының қалпына келу барысын бақылауды жалғастырады. Осыдан кейін оның келесі матчтарға қатысуы жөнінде шешім қабылданады.
Самородов Қазақстан құрамасының турнир алдындағы жалғыз кадрлық жоғалтуы емес. Бұған дейін жарақатына байланысты Алибек Қасым мен Ислам Чесноков ұлттық құрама орналасқан жерден кеткен болатын. Қасым команданың алдағы екі матчын өткізіп алса, Чесноков осы кезеңде жоспарланған төрт кездесудің ешқайсысына қатыса алмайды.
Қазақстан құрамасы Ұлттар лигасының жаңа маусымындағы алғашқы матчын Фарер аралдарына қарсы өткізеді. Командалар 26 қыркүйекте кездеседі. Ойын Астана уақытымен 21:00-де басталады.