Мартин «Ордабасының» Қазақстан Кубогының финалына шығуына қатысты пікір білдірді

Жартылай финалдың қарымта матчында «Ордабасы» тағы да «Алтайдан» басым түсті — 2:1. Алғашқы кездесуде де Мартин шәкірттері 3:1 есебімен жеңіске жеткен болатын. Осылайша, шымкенттік клуб екі ойынның қорытындысы бойынша финалға жолдама алды.

Матчтан кейін Мартин бірінші кездесуден кейінгі қолайлы нәтижеге қарамастан, команда есепті сақтап қалуға бағытталған ойын көрсетпегенін атап өтті.

«Команданы, клубты, Шымкент қаласын және барлық жанкүйерлерімізді кезекті рет финалға шыққанымызбен құттықтағым келеді. Біз үшін екінші жыл қатарынан Қазақстан Кубогы үшін күресу — үлкен мәртебе. Жігіттер жақсы ойын көрсетіп, алдымызға қойылған міндетті орындау арқылы бұл жеңіске лайық болды», — деді бапкер.

Маманның айтуынша, «Ордабасы» әдеттегі ойын мәнерін ұстанып, матч барысын бақылауға тырысқан.

«Біз есепті сақтап қалуға тырысып, тек нәтижеге қарай ойнау дұрыс стратегия емес екенін түсіндік. Мұндай жағдайда жазаланып қалуың мүмкін. Сондықтан тағы да өз ойынымыз арқылы әрекет етуге тырыстық: допты бақылау, мүмкіндіктер жасау және таңдалған жоспардан ауытқымау», — деп атап өтті Мартин.

Бас бапкер матч барысында команда қателіктер жібергенін мойындағанымен, футболшылардың жалпы ойынына көңілі толатынын айтты.

«Кей тұста жақсы ойнадық, кей жерлерде кемшіліктер болды. Бірақ жалпы алғанда, жігіттердің көрсеткен ойынына өте ризамын. Ең бастысы — қажетті нәтижеге қол жеткізіп, турнирдегі жолымызды жалғастырдық. Біз жеңілгіміз келмеді және жартылай финалды жеңіспен аяқтауға ұмтылдық», — деді «Ордабасының» бас бапкері.

Мартин шымкенттік клубтың жанкүйерлеріне қолдауы үшін жеке алғысын білдірді.

«Жанкүйерлерімізге үлкен рақмет. Олар әрдайым командамен бірге, бізбен бірге ел бойынша сапарлап, қолдау көрсетеді. Оларға үлкен құрмет. Біз оларды әрдайым стадионда күтеміз және жақсы нәтижелермен қуантуға тырысамыз», — деп қосты маман.

Қазақстан Кубогының финалында «Ордабасы» Қызылорданың «Қайсар» командасымен кездеседі. Шешуші матч 7 қарашада Астанада өтеді.

Шымкенттік клуб үшін бұл ұлттық кубокты жеңіп алуға берілген кезекті мүмкіндік болмақ. «Ордабасы» бұған дейін екі рет — 2011 және 2022 жылдары трофей иеленген. Сонымен қатар команда тағы үш рет финалға шығып, шешуші матчта жеңіліс тапқан — 2007, 2023 және 2025 жылдары.

Осылайша, «Ордабасы» клуб тарихындағы Қазақстан Кубогының үшінші трофейін жеңіп алу мүмкіндігіне ие болды.