Мюнхендегі ғасыр финалы, Пеленің ұлы жолының бастауы және Шумахердің мерейтойлық жеңісі: спорт тарихындағы бұл күн

Қазақстан

«Қайрат» Чемпиондар лигасы іріктеуінде «Маккаби Хайфамен» тең түсті

2021 жыл – Алматының «Қайрат» клубы Чемпиондар лигасы бірінші іріктеу кезеңінде сырт алаңда Израильдің «Маккаби Хайфа» командасымен 1:1 есебімен тең ойнады. Голдарды Омер Ацили мен Нұралы Әліп соқты. Бір аптадан кейін өткен қарымта кездесуде «Қайрат» 2:0 есебімен жеңіп, келесі кезеңге жолдама алды.

Батыс Германияның екінші әлем чемпиондығы

1974 жыл – Мюнхендегі әлем чемпионатының финалында Батыс Германия Нидерландты 2:1 есебімен жеңді. Мюнхендегі Олимпиада стадионында өткен матчта нидерландтықтар сапынан Йохан Нескенс пенальтиден гол соқты. Ал немістер құрамында Пауль Брайтнер пенальтиден мергендік танытып, Герд Мюллер жеңіс голын енгізді. Бұл Батыс Германияның әлем чемпионатындағы екінші титулы болды.

Мартина Навратилованың тарихи жеңісі

1979 жыл – Чехословакияда дүниеге келген америкалық теннисші Мартина Навратилова Уимблдондағы екінші чемпиондығына қол жеткізді. Финалда ол америкалық Крис Эвертті 6:4, 6:4 есебімен жеңді.

Шумахердің мерейтойлық жеңісі

2002 жыл – Атақты неміс автогоншысы Михаэль Шумахер Ұлыбритания Гран-приінде жеңіске жетіп, мансабындағы 60-жеңісіне қол жеткізді. «Сильверстоун» трассасындағы жарыста Рубенс Баррикелло екінші, Хуан Пабло Монтойя үшінші орын алды.

Андерсон Силваның бесінші чемпиондық қорғанысы

2007 жыл – Калифорнияда өткен UFC 73: Stacked турнирінің басты жекпе-жегінде бразилиялық аңыз Андерсон Силва америкалық Нейт Марквардты бірінші раундта техникалық нокаутпен жеңіп, орта салмақтағы UFC чемпионы атағын бесінші рет сәтті қорғады.

«Өрмекші» лақап атымен танымал Андерсон Силва UFC тарихындағы ең үздік файтерлердің бірі саналады. Ол Чейл Соннен, Витор Белфорт, Демиан Майя, Дэн Хендерсон, Рич Франклин, Форрест Гриффин, Юсин Оками секілді танымал спортшыларды жеңіп, кейін UFC Даңқ залына енгізілді.

Борис Беккердің рекорды

1985 жыл – Неміс теннисшісі Борис Беккер Уимблдон тарихындағы ең жас чемпион атанды. Ол жеңіске жеткен сәтте небәрі 17 жас 7 айлық еді. Бұл рекорд әлі күнге дейін жаңарған жоқ.

Пеленің ұлы жолының бастауы

1957 жыл – 16 жастағы Пеле алғаш рет Бразилия құрамасының сапында алаңға шықты. Оның дебюті Рока кубогында Аргентинаға қарсы әйгілі «Маракана» стадионында өтті. Пеле қосалқы құрамнан шығып, ұлттық құрамадағы алғашқы голын соқты. Дегенмен Бразилия 1:2 есебімен жеңіліп қалды.

Хулио Сесар Чавестің АҚШ-тағы жарқын жеңісі

1985 жыл – АҚШ телеарнасында алғаш рет жеңіліс көрмеген мексикалық боксшы Хулио Сесар Чавестің жекпе-жегі көрсетілді. Лас-Вегастағы Riviera Hotel & Casino аренасында ол WBC тұжырымы бойынша екінші жеңіл салмақтағы чемпиондық белбеуін америкалық Роджер Мэйвезерге қарсы қорғады.

Жекпе-жектің алғашқы минуттарында басымдық Мэйвезер жағында болғанымен, кейін Чавес бастаманы өз қолына алып, қарсыласын арқанға қысып, 2 минут 30 секундта техникалық нокаутпен жеңіске жетті. Төрт жылдан кейін өткен реваншта да Чавес мерзімінен бұрын жеңіп, бұл жолы WBC-дің жеңіл салмақтағы чемпиондық белбеуін иеленді.

Осы күні дүниеге келгендер

1987 жыл – Алекс Перейра, бразилиялық ММА шебері, UFC ұйымының бұрынғы орта және жартылай ауыр салмақтағы чемпионы.

1984 жыл – Біржан Жақыпов, қазақстандық боксшы, 2013 жылғы әлем чемпионы, әлем чемпионатының қола жүлдегері және Азия ойындарының екі дүркін күміс жүлдегері.