«Өте қиын»: Сергей Кейлер «Ордабасыға» ауысқаннан кейін «Ұлытау» жанкүйерлеріне үндеу жасады
«Ұлытау» ФК
31 жастағы қорғаушы Сергей Кейлер жезқазғандық Ұлытау клубында бір жарым жыл ойнағаннан кейін Ордабасы командасына ауысты.
Трансферден кейін футболшы бұрынғы командасының жанкүйерлеріне үндеу жасап, өзінің кетуіне байланысты ешкімді кінәламауды сұрады.
«Құрметті жанкүйерлер, шын жүректен айтарым: қолдауларыңыз үшін және жасаған барлық жақсылықтарыңыз үшін үлкен рақмет! Клуб басшылығына, бапкерлер штабына, қызметкерлерге, база ұжымына және бүкіл қалаға алғыс айтамын. Бір жарым жыл ішінде біз өте жақын болып, көп нәрсені бірге бастан өткердік.
Өте қиын, бірақ бұл – футболшының өмірі. Сіздерден адам ретінде сұраймын: ешкімді айыптамаңыздар, жаман сөз айтпаңыздар. Бұл қала мен клубта өткізген уақытым мен үшін ең үздік кезеңдердің бірі болды. Ұлытау – Жезқазған менің жүрегімде мәңгі қалады», – деп жазды Кейлер әлеуметтік желіде.
Футболшының ауысқанын Ордабасы клубы ресми түрде жариялады. Қорғаушымен жасалған келісімшарт 2027 жылдың қараша айына дейін есептелген. Кейлер «Ұлытау» сапында 2025 жылдың ақпанынан бері ойнап, команданы жиі капитан ретінде алаңға бастап шыққан.
Ағымдағы маусымда ол 17 матч өткізіп, 1 гол соғып, 2 нәтижелі пас берген.
Айта кетейік, Қазақстан чемпионатының 17 турында Ордабасы 40 ұпай жинап, турнир кестесінде көш бастап тұр. Келесі ойынын команда 19 шілде күні Елімай клубына қарсы өткізеді.