«Пахтакор» трагедиясына 47 жыл және Надальдің Канададағы жеңісі: спорт тарихындағы бұл күн

«Пахтакор» қаза тапқанына 47 жыл

1979 – осы күні қазіргі Украинаның Каменское қаласы орналасқан аумақта ірі әуе апаты болды. «Аэрофлот» компаниясының екі Ту-134А ұшағы соқтығысып, 178 адам қаза тапты. Қайтыс болғандардың арасында Ташкенттің «Пахтакор» футбол командасы да болды.

Футболшылар Ташкенттен Минскіге КСРО чемпионатының жоғары лигасында жергілікті «Динамомен» өтетін матчқа бара жатқан. Команданың бірнеше ойыншысы мен бас бапкері Олег Базилевич тағдырлы рейске кездейсоқ отырмай қалған. Қаза тапқан футболшылардың денелері мырыш табыттарға салынды.

Қайғылы оқиғаға Харьков әуе қозғалысын басқару орталығы диспетчерлерінің ауысым бастығы Владимир Сумский мен оның тағылымдамашысы Николай Жуковский кінәлі деп танылды. Сот оларды жалпы режимдегі колонияда 15 жылға бас бостандығынан айыруға үкім шығарды. Сумский түрмеде өзін жақсы көрсеткені үшін алты жылдан кейін босатылса, Жуковский колонияда өзіне қол жұмсады.

Карл Льюистің Лос-Анджелестегі триумфы

1984 – осы күні америкалық жеңіл атлет Карл Льюис Лос-Анджелестегі Олимпиада ойындарында төртінші алтын медалін жеңіп алды. Ол 4×100 метр эстафетаның соңғы кезеңінде жүгіріп, 8,4 секунд нәтиже көрсетті.

Льюистің жеңісінің арқасында АҚШ құрамасы алтын медальға ие болып, 37,83 секундтық әлемдік рекорд орнатты. Сонымен қатар Карл Льюис Олимпиада жүлделерінің саны бойынша аңызға айналған Джесси Оуэнстің рекордын қайталап, бір Олимпиадада төрт алтын медаль жеңіп алды.

Рафаэль Надальдің жарқын жеңісі

2019 – осы күні испаниялық теннисші Рафаэль Надаль Монреальда өткен ATP Masters 1000 турнирінің финалында ресейлік Даниил Медведевті ойсырата жеңіп, бесінші Роджерс кубогын иеленді.

Кездесу 6:3, 6:0 есебімен аяқталды. Сонымен қатар Надаль Masters сериясындағы 35-титулын жеңіп алды.

Том Круз бен Снуп Догг Париж Олимпиадасының жабылу салтанатында өнер көрсетті

2024 – осы күні Парижде XXXIII жазғы Олимпиада ойындары аяқталды. Ойындардың жабылу салтанаты Париж маңындағы «Стад де Франс» стадионында өтті. Салтанатты шараның режиссері әрі қоюшы-режиссері актер Тома Жолли болды.

Музыкалық бағдарлама аясында көрермендер алдында француздың Air және Phoenix топтары, Билли Айлиш пен Снуп Догг өнер көрсетті. Ал кештің басты шарықтау шегі америкалық актер Том Круздың әсерлі трюгі болды. Ол стадионның төбесінен арқанмен түсіп, Олимпиада туын өзімен бірге алып шықты.

Бұл күні дүниеге келгендер:

1967 – Массимилиано Аллегри, италиялық футболшы және бапкер. Ол «Кальяри», «Милан» және «Ювентус» клубтарында жұмыс істеді. Италия футболы тарихында төрт жыл қатарынан «алтын дубль» жеңіп алған алғашқы бапкер.

1988 – Пэтти Миллс, австралиялық баскетболшы, «Сан-Антонио Спёрс» құрамында 2014 жылғы НБА чемпионы, Токио Олимпиадасының қола жүлдегері.

1990 – Иван Дычко, қазақстандық боксшы, Олимпиада ойындарының екі дүркін қола жүлдегері (Лондон-2012, Рио-де-Жанейро-2016).