Пеле әлемді бағындырып Шумахер жаңбыр астында жеңіске жетті: спорт тарихындағы бұл күн

Пеленің жұлдызы жанды

1958 жылы осы күні Стокгольмдегі «Росунда» стадионында футболдан әлем чемпионатының финалы өтті. Бразилия құрамасы алаң иесі Швецияны 5:2 есебімен жеңді. Бұл ойында 17 жастағы Пеле тарихи дубль жасап, турнирдің ең үздік жас ойыншысы атанды.

Осы матчта Бразилия алғашқы әлем чемпиондығын жеңіп алды. Кейін олар барлық мундиальдарға қатысқан жалғыз командаға айналды. «Сары-жасылдар» бұл турнирде бес рет жеңіске жетті (1958, 1962, 1970, 1994, 2002).

Ауыр салмақтың болашақ жұлдызының дебюті

1954 жылы болашақ абсолютті әлем чемпионы Сонни Листон кәсіби мансабындағы алғашқы ірі жеңісіне жетті. Детройттағы алғашқы тележекпе-жегінде ол Мичиганның мықты ауыр салмақ өкілі Джонни Саммерлинді төрешілердің бірауызды шешімімен жеңді.

Кейін Листон Мұхаммед Әлимен жұдырықтасып, бокс даңқ залына енді.

Марадонаның соңғы шешуші әрекеті

1986 жылы Аргентина құрамасы тарихында екінші рет әлем чемпионы атанды. Финалда олар Германия құрамасын жеңді. Диего Марадона бұл матчта гол соқпаса да, ойын тағдырын шешкен сәтке тікелей ықпал етті.

84-минутта ол допты өз алаңынан қабылдап, жағдайды лезде бағалап, Хорхе Бурручагеге дәл пас берді. Бурручага қақпаға қарай ұмтылып, қақпашы Шумахерді алдап өтіп, есепті 3:2-ге жеткізді.

Уимблдондағы тарихи матч

1977 жылы британдық теннисші Вирджиния Уэйд Уимблдон жартылай финалында сенсациялық жеңіске жетіп, турнирдің сол кездегі чемпионы Крис Эвертті 6:2, 4:6, 6:1 есебімен ұтты. Осы жеңістің арқасында финалға шығып, кейін турнирді жеңіп алды. Ол әлі күнге дейін Уимблдонды жеңген соңғы британдық теннисші болып саналады.

Шумахердің кезекті жеңісі

1997 жылы «Формула-1» жарысының аңызы Михаэль Шумахер Франция Гран-приінде жеңіске жетті.

Маньи-Кур трассасындағы жарыс жаңбыр астында өтіп, неміс жүргізушісі Ferrari командасы сапында керемет шеберлік көрсетті. Ол басты қарсыласы Хайнц-Харальд Френтценді жарты минутқа артта қалдырды.

Нганнудың жойқын жеңісі

2019 жылы Миннеаполисте өткен UFC on ESPN 3 турнирінде камерунық Фрэнсис Нганну ауыр салмақтағы бұрынғы чемпион Джуниор Дос Сантоспен жұдырықтасты. Нганну бірінші раундта-ақ техникалық нокаутпен жеңіске жетті (1:11).

11 секундтағы гол: түріктер мундиаль қожайындарын тоқтатты

2002 жылы түркиялық шабуылшы Хакан Шүкюр әлем чемпионаттары тарихындағы ең жылдам голды соқты. Ол матч басталғаннан кейін небәрі 11 секундта қарсылас қақпасын дәл көздеді. Ойын Оңтүстік Кореяға қарсы өтіп, 3:2 есебімен Түркияның пайдасына аяқталды. Түркия сол турнирде қола жүлдегер атанды.

Бұл күні туғандар:

2003 – Джуд Беллингем, ағылшын футболшысы, «Реал Мадрид» клубы мен Англия құрамасының жартылай қорғаушысы. 2023/24 маусымында Чемпиондар лигасын жеңіп алған.

2002 – Максим Самородов, қазақстандық футболшы, «Ахмат» клубы мен Қазақстан құрамасының шабуылшысы.

1994 – Леандро Паредес, аргентиналық футболшы, «Бока Хуниорс» клубы мен Аргентина құрамасының жартылай қорғаушысы, 2022 жылғы әлем чемпионы.