«Қайрат» Латвияға аттанды
«Қайрат» ФК
Алматылық «Қайрат» УЕФА Конференциялар лигасының 2026/27 жылғы маусымындағы жалпы кезеңнің алғашқы матчын өткізу үшін Рига қаласына ұшып кетті. Қазақстандық клуб 15 қазанда аттас латвиялық командамен кездеседі.
«Қайраттың» баспасөз қызметі Instagram желісінде футболшылар мен жаттықтырушылар штабының Алматы әуежайынан сапарға аттанған сәтінен фото және видео жариялады.
«Рига» мен «Қайрат» арасындағы кездесу «Сконто» стадионында өтеді. Матч Қазақстан уақытымен 21:45-те басталады. Рафаэль Уразбахтиннің командасы Чемпиондар лигасы мен Еуропа лигасының іріктеу кезеңдерінен өткеннен кейін еурокубоктің негізгі кезеңіндегі ойындарын бастайды.
Еурокубоктегі матч алдында «Қайрат» Қазақстан Премьер-лигасында «Жетісуды» 1:0 есебімен жеңді. 27 ойыннан кейін 60 ұпай жинаған алматылықтар турнир кестесінде екінші орында келеді. Көш бастап тұрған «Ордабасыдан» төрт ұпайға қалып отыр. Ал «Рига» Латвия чемпионатының соңғы турында «Тукумс 2000» командасын 2:0 есебімен ұтты.
Конференциялар лигасының жалпы кезеңінде «Қайрат» алты матч өткізеді. Латвиядағы кездесуден кейін 22 қазанда өз алаңында Грекияның «Панатинаикос» клубын қабылдайды. Ал 5 қарашада Италияда «Аталантамен» ойнайды.
Алматылық клубтың басқа қарсыластары — Швецияның «Мьельбю», Румынияның «Университатя Крайова» және Нидерландтың «Твенте» командалары.