Қамшыбек Қоңқабаевтың Азия ойындарындағы күмісі және Исраэль Адесаньяның нокауты: 5 қазан тарихта

Қазақстан

Ханчжоудағы Азия ойындарындағы жүлделер

2023 жыл – осы күні Қазақстан спортшылары Ханчжоуда өтіп жатқан Азия ойындарында бірнеше медаль жеңіп алды:

Каратэші Нұрқанат Әжіқанов (75 келі) алтын медаль иеленді. Финалда ол Иордания өкілі Хасан Масарвехті мерзімінен бұрын жеңді.

Каратэші Лаура Әліқұл (68 келі) күміс жүлдегер атанды. Финалда ол қытайлық Ли Цяоцяодан жеңілді.

Джиу-джитсуші Нұржан Батырбеков (69 келі) Азия ойындарының чемпионы атанды. Финалда ол Біріккен Араб Әмірліктерінің өкілі Мұхаммед Әл-Сувадиді 4:2 есебімен жеңді.

Боксшы Қамшыбек Қоңқабаев (92 келі) күміс жүлдеге ие болды. Финалда ол өзбекстандық Баходир Жалоловтан жеңілді.

Боксшы Карина Ибрагимова (57 келі) күміс медаль жеңіп алды. Финалда ол Тайбэй өкілі, әлемнің қазіргі чемпионы Линь Юйтиннен жеңілді.

Қазақстандық велошабандоздар Евгений Федоров пен Алексей Луценко да ел қоржынына екі медаль салды. Федоров алтын, Луценко күміс медаль иеленді.

Грек-рим күресінің балуаны Алимхан Сыздықов (130 келі) қола медаль үшін белдесуде Түрікменстан өкілі Айбегшазад Курраевты жеңді.

Әлем

Автоспорттағы маңызды күн

1969 жыл – австриялық Йохен Риндт (Lotus-Ford) АҚШ Гран-приінде жеңіске жетті. Екінші және үшінші орындарды британдық Пирс Каридж (Brabham-Ford) бен Джон Сёртис (BRM) иеленді. Жарыс кезінде британдық Грэм Хилл ауыр апатқа ұшырады. Оның болидінің дөңгелегі жарылып, көлік трассадан шығып кеткен. Соның салдарынан Хилл екі аяғын да сындырды. Жарыс «Уоткинс-Глен» трассасында өтті.

1975 жыл – австриялық Ники Лауда (Ferrari) АҚШ Гран-приінің жеңімпазы атанды. Екінші орынға бразилиялық Эмерсон Фиттипальди (McLaren-Ford), үшінші орынға оның командаласы, неміс Йохен Масс жайғасты.

1980 жыл – австралиялық Алан Джонс АҚШ Гран-приінде жеңіске жетті. Аргентиналық Карлос Ройтеман (Williams-Ford) екінші, француз Дидье Пирони (Ligier-Ford) үшінші орын алды. Жарыс «Уоткинс-Глен» трассасында өтті.

Марион Джонстың допинг дауы

2007 жыл – америкалық жеңіл атлет Марион Джонс 2000 жылы Сиднейде өткен Олимпиада ойындарының алдында тыйым салынған препараттарды қолданғанын мойындады. Ол Нью-Йорктің Оңтүстік округіндегі Уайт-Плейнс қаласында өткен сот отырысында бұл туралы мәлімдеді. Спортшы АҚШ-тың федералды тергеушілеріне жалған ақпарат бергенін де мойындады.

Сидней Олимпиадасында Марион Джонс АҚШ құрамасы сапында үш алтын және екі қола медаль жеңіп алған болатын. Мойындауынан кейін Джонс спорттық мансабын аяқтайтынын мәлімдеді. Кейін спортшының барлық Олимпиада медальдары қайтарылып алынып, федералды тергеушілерге жалған ақпарат бергені үшін алты айға бас бостандығынан айырылды.

Мария Шарапованың жарқын жеңісі

2014 жыл – белгілі ресейлік теннисші Мария Шарапова Қытайдағы беделді China Open турнирінің жеңімпазы атанды. Финалда ол чехиялық Петра Квитованы 6:4, 2:6, 6:3 есебімен жеңді.

Исраэль Адесанья – UFC чемпионы

2019 жыл – Жаңа Зеландия өкілі, ММА файтері Исраэль Адесанья UFC 243 турнирінде австралиялық Роберт Уиттакерді екінші раундта нокаутқа түсірді. Бұл жеңістің арқасында Адесанья UFC-дің орта салмақтағы чемпионы атанды.

5 қазанда әлем тарихында болған оқиғалар

1984 жыл – Марк Гарно ғарышқа ұшқан алғашқы канадалық атанды.

1999 жыл – Лондонда «Паддингтон» вокзалы маңында теміржол апаты болып, 31 адам қаза тапты.

5 қазанда дүниеге келген спортшылар

1965 жыл – Марио Лемье, канадалық хоккейші, 2002 жылғы Солт-Лейк-Сити Олимпиадасының чемпионы, «Питтсбург Пингвинз» құрамында Стэнли кубогын екі рет жеңіп алған.

1965 жыл – Патрик Руа, канадалық хоккейші, Стэнли кубогын төрт рет жеңіп алған: «Монреаль Канадиенс» сапында екі рет және «Колорадо Эвеланш» құрамында екі рет.

1972 жыл – Грант Хилл, америкалық баскетболшы, 1996 жылғы Атланта Олимпиадасының чемпионы. NBA-дің жұлдыздар матчына бірнеше рет қатысқан. 2018 жылдан бері Баскетбол даңқ залында.