Қазақстан дзюдодан кадеттер арасындағы әлем чемпионатының аралас командалық жарысында алғаш рет финалға шықты

Жартылай финалда қазақстандық дзюдошылар Өзбекстан құрамасын 4:2 есебімен жеңіп, турнирдің шешуші кезеңіне жолдама алды.

Финалға шығу жолында Қазақстан намысын Зере Талғатқызы (-48 келі), Ғабит Расулхан (-60 келі), Әзима Серік (-63 келі), Әлижан Сайлаубеков (-81 келі), Тоғжан Төлебай (+63 келі) және Әділжан Жаудинов (+81 келі) қорғады.

Қазақстандық дзюдошылар финалға дейін алдымен Болгария құрамасын 4:1 есебімен жеңді. Одан кейін ширек финалда Жапония құрамасын 4:2 есебімен жарыстан шығарып, сенсация жасады.

Финалда Қазақстан құрамасы Бразилиямен кездеседі. Шешуші белдесулер Астана уақытымен сағат 03:00-де басталады.

Айта кетейік, бұған дейін Қазақстан кадеттер арасындағы әлем чемпионатының аралас командалық жарысында ешқашан финалға шықпаған.

Еске салайық, әлем чемпионатының жеке жарыстарында қазақстандық спортшылар 10 медаль жеңіп алды: 3 алтын, 3 күміс және 4 қола. Қазақстан жалпы медальдық есепте екінші орынға ие болды.