Қазақстанға қарсы дебюттен әлемдік рекордтарға дейін: Роналдудың Португалия құрамасындағы 23 жылдық жолы

23 жыл ішінде Роналду ұлттық құрама сапында өткізген матчтары мен соққан голдарының саны бойынша әлемдік рекорд орнатты. Еуропа чемпионы атанып, Ұлттар лигасын екі рет жеңіп алды.

Алайда бұл жетістіктердің артында ауыр жеңілістер, қолдан кеткен чемпиондық атақтар мен Португалия футболының тарихын өзгерткен жеңістер жатыр.

Ал бәрі 2003 жылдың 20 тамызында басталған еді. Сол күні 18 жастағы Роналду алғаш рет Португалия құрамасының жейдесін киіп, алаңға шықты. Оның алғашқы қарсыласы Қазақстан болды.

2003 жылдың жазында Криштиану үлкен футболдағы алғашқы қадамдарын жасап жатқан еді. Ұлттық құрамадағы дебютіне аз уақыт қалғанда ол лиссабондық «Спортингтен» ағылшынның «Манчестер Юнайтед» клубына ауысты.

20 тамызда Португалия Шавиш қаласында Қазақстан құрамасын жолдастық кездесуде қабылдады. Ол кезде португалиялықтардың сапында Луиш Фигу, Руй Кошта, Деку секілді танымал футболшылар өнер көрсететін. Команданы Луис Фелипе Сколари жаттықтырды.

Роналду кездесуді қосалқы құрамда бастап, екінші таймда алаңға шықты. Ол кезде есеп 0:0 болатын.

УЕФА құрамына жақында ғана қосылған Қазақстан құрамасы Еуропа чемпионатын қабылдауға дайындалып жатқан Португалияға лайықты қарсылық көрсетті.

Матчтағы жалғыз гол 65-минутта соғылды. Элдер Поштиганың пасынан кейін қазақстандық қорғаушы Игорь Солошенко допты сәтсіз тоқтатты. Нәтижесінде доп Симау Саброзадан кері серпіліп, қақпаға енді.

Португалия 1:0 есебімен жеңіске жетті.

Роналду алғашқы ойынында гол соққан жоқ. Дегенмен дәл осы кездесуден оның ұлттық құрамадағы 23 жылдық тарихи жолы басталды.

Бір жылдан кейін Роналду алғаш рет Еуропа чемпионатына қатысты. 2004 жылғы турнир Португалияда өтті. Алаң иелері өз тарихындағы алғашқы ірі халықаралық жүлдені жеңіп алуды көздеді.

Грекияға қарсы алғашқы матчта 19 жастағы Криштиану ұлттық құрамадағы тұңғыш голын соқты. Алайда португалиялықтар 1:2 есебімен жеңілді.

Кейін жартылай финалда Нидерланд қақпасына гол соғып, командасының финалға шығуына көмектесті.

Шешуші кездесуде Португалия тағы да Грекиямен кездесті. Ангелос Харистеастың жалғыз голы гректерге 1:0 есебімен жеңіс әкелді.

Финалдық ысқырықтан кейін жас Роналду көз жасына ерік берді.

2006 жылғы әлем чемпионатында Португалия жартылай финалға дейін жетті. Ширек финалда Англияны пенальти сериясында жеңгенімен, келесі кезеңде Франциядан ұтылды. Ал үшінші орын үшін кездесуде Германияға есе жіберді.

Еуро-2008 және Еуро-2012 турнирлерінде де португалиялықтар плей-офф кезеңінен аса алмады. Әсіресе 2012 жылғы Еуропа чемпионатының жартылай финалында Испаниядан пенальти сериясында жеңілу ауыр тиді.

Бұл уақытта Роналду құраманың капитаны әрі басты жұлдызына айналған еді. Бірақ көптен күткен чемпиондық атақ әлі бұйырмады.

2016 жылғы Францияда өткен Еуропа чемпионаты Португалия үшін бетбұрыс кезеңіне айналды.

Команда топтық кезеңдегі үш матчтың ешқайсында жеңіске жетпесе де, плей-оффқа жолдама алды. Венгрияға қарсы шешуші кездесуде Роналду дубль жасап, командасын жарыста сақтап қалды.

Плей-оффта португалиялықтар Хорватия, Польша және Уэльс құрамаларын жарыстан шығарды. Жартылай финалда Криштиану Уэльс қақпасына екі голдың бірін соқты.

2016 жылдың 10 шілдесінде Португалия финалда Франциямен кездесті.

Алайда Роналду 25-минутта тізесінен жарақат алып, алаңнан кетуге мәжбүр болды. Қалған уақытта ол командаластарына алаң жиегінен қолдау көрсетті.

Қосымша уақыттың 109-минутында Эдер жеңіс голын соқты.

Осылайша, Португалия тарихында алғаш рет Еуропа чемпионы атанды.

Бұл Роналду үшін ерекше сәт болды. 2004 жылғы өз еліндегі финалда жеңілгеннен кейін араға 12 жыл салып, ол ұлттық құрама сапындағы алғашқы ірі жүлдесін жеңіп алды.

Еуро-2016-дан кейін де Роналду халықаралық мансабын жалғастырды.

2018 жылғы әлем чемпионатында ол Испанияға қарсы хет-трик жасады. Соңғы минуттарда айып добынан соққан голы Португалияға 3:3 есебіндегі тең нәтижені сыйлады.

2019 жылы Криштиану УЕФА Ұлттар лигасының алғашқы маусымында жеңімпаз атанды.

Жартылай финалда Швейцария қақпасына үш гол соқса, финалда Португалия Нидерландты 1:0 есебімен жеңді.

2021 жылдың қыркүйегінде Роналду тағы бір тарихи жетістікке қол жеткізді. Әлем чемпионатының іріктеу кезеңінде Ирландияға қарсы дубль жасап, ұлттық құрамадағы голдарының санын 111-ге жеткізді.

Осылайша, ирандық Әли Даеидің әлемдік рекордын жаңартты.

2022 жылғы әлем чемпионатында Криштиану бес түрлі әлем біріншілігінде гол соққан алғашқы ер футболшы атанды.

Ал 2025 жылдың маусымында 40 жастағы Роналду ұлттық құрамамен үшінші халықаралық трофейін жеңіп алды.

Ұлттар лигасының жартылай финалында ол Германияға қарсы жеңіс голын соқты. Финалда Испаниямен кездесуде 61-минутта есепті теңестірді.

Негізгі және қосымша уақыт 2:2 есебімен аяқталып, пенальти сериясында Португалия 5:3 есебімен басым түсті.

Осылайша, Португалия Ұлттар лигасын екі рет жеңген алғашқы құрама атанды.

2026 жылдың жазында Роналду мансабындағы алтыншы әлем чемпионатына қатысты.

41 жастағы футболшы Өзбекстанға қарсы кездесуде екі гол соғып, алты түрлі әлем чемпионатында мергендігімен көзге түскен алғашқы ойыншы атанды.

Алайда Португалияның чемпиондыққа таласы 1/8 финалда аяқталды. Команда Испаниядан 0:1 есебімен жеңілді.

Турнирден кейін Роналду бұл өзінің соңғы әлем чемпионаты болғанын растады. Соған қарамастан, ұлттық құрамадағы өнерін жалғастырды.

5 қарашада Криштиану қараша айындағы кездесулерден кейін халықаралық мансабын біржола аяқтайтынын жариялады.

РОНАЛДУДЫҢ ПОРТУГАЛИЯ ҚҰРАМАСЫНДАҒЫ КӨРСЕТКІШТЕРІ

Матч

Гол

Әлем чемпионаты

Ірі халықаралық трофей

23 жыл ішінде Роналду алты әлем чемпионаты мен алты Еуропа чемпионатына қатысып, ұлттық құрамалар тарихындағы ең нәтижелі футболшы атанды.

Ең қызығы, оның Португалия құрамасындағы тарихи жолы Қазақстанға қарсы матчтан басталған.

2003 жылдың 20 тамызында 18 жастағы Криштиану құраманың жас ойыншысы болса, араға 23 жыл салып, ол футбол тарихындағы ең ірі тұлғалардың бірі ретінде ұлттық құрамамен қоштасып жатыр.

Роналдудың Португалия құрамасындағы тарихы Қазақстанды 1:0 есебімен жеңген матчтан басталып, Еуропа чемпиондығы, Ұлттар лигасындағы екі жеңіс және әлемдік рекордтармен аяқталмақ.