«Реал Мадрид» Мбаппенің хет-тригі арқасында «Реал Сосьедадты» ірі есеппен жеңді
Фото: Getty Images
Мадридтік «Реал» Испания чемпионатының кейінге қалдырылған бірінші турындағы матчта «Реал Сосьедадтан» сенімді басым түсті.
«Сантьяго Бернабеу» стадионында өткен кездесу алаң иелерінің 4:1 есебіндегі жеңісімен аяқталды.
Есеп үзіліске аз уақыт қалғанда ашылды. 40-минутта Килиан Мбаппе мүмкіндігін сәтті пайдаланып, мадридтіктерді алға шығарды. Алайда қонақтар көп ұзамай жауап қайтарды. 44-минутта Лука Сучич «Реалдың» қақпасына гол соғып, есепті теңестірді.
Екінші таймда алаң иелері қайтадан бастаманы өз қолына алды. 60-минутта Мбаппе екінші голын соқты. Арада сегіз минут өткенде Винисиус Жуниор мадридтік команданың басымдығын еселей түсті. Матчтағы соңғы нүктені Мбаппе қойды. 80-минутта француз шабуылшысы үшінші рет гол соғып, хет-трик рәсімдеді.
Испания. Примера. 1-тур
«Реал Мадрид» – «Реал Сосьедад» – 4:1
Голдар: Мбаппе, 40, 60, 80; Сучич, 44; Винисиус, 68.
Ла Лиганың екінші турында да мадридтіктер оң нәтижеге қол жеткізіп, өз алаңында «Эспаньолды» 2:1 есебімен жеңген еді. Ал «Реал Сосьедад» «Бетиске» 0:1 есебімен жол берді.
«Реал» келесі кездесуін 30 тамызда өз алаңында «Малагаға» қарсы өткізеді. Ал «Реал Сосьедад» бір күн бұрын, 29 тамызда «Эспаньолды» қабылдайды.
