Ресми: «Ақтөбе» Абат Аймбетовтың оралуын жариялады
ҚФФ
«Ақтөбе» клубы Қазақстан құрамасының бұрынғы шабуылшысы Абат Аймбетовтың командаға қайта оралғанын ресми түрде жариялады.
29 жастағы форвард үшін бұл жай ғана мансаптағы жаңа кезең емес, туған клубына оралу болып табылады.
Аймбетов футболдағы жолын дәл осы «Ақтөбе» жүйесінде бастаған. Ол негізгі команда сапында 2013 жылдан 2020 жылға дейін ойнап, кейін мансабын басқа клубтарда жалғастырды.
Қазақстан чемпионатында шабуылшы «Қайрат» пен «Астана» клубтарының намысын қорғады. Кейін шетелде бағын сынап көруге мүмкіндік алды. Алдымен түркиялық «Адана Демирспор» клубына ауысып, одан соң румыниялық «Петролул» командасында өнер көрсетті. Плоешти клубының құрамында ол тоғыз матчқа қатысып, бір гол соқты.
Sport-hub.kz мәліметінше, еуропалық кезеңін аяқтағаннан кейін ойыншыға «Қызылжар» клубы да қызығушылық танытқан. Алайда Аймбетов кәсіби мансабы басталған «Ақтөбе» клубына қайта оралуды жөн көрді.
Еске сала кетейік, Қазақстан Премьер-лигасының 17 турынан кейін «Ақтөбе» турнирлік кестеде 25 ұпаймен жетінші орында тұр.