Ролан Гарросстың Жерорта теңізі арқылы тарихи ұшуы және Федерердің қоштасу матчы: 23 қыркүйектегі спорт тарихы

Қазақстан

Қазақстандық спортшылар Азия ойындарында бірнеше медаль жеңіп алды

2014 жыл – осы күні Қазақстан спортшылары Оңтүстік Кореяның Инчхон қаласында өткен Азия ойындарындағы жарыстарын жалғастырды.

- Жүзуші Дмитрий Баландин 200 метрге брасс әдісімен жүзуде 2:07.67 нәтижесімен алтын медаль жеңіп алды. Инчхондағы Азия ойындарында Баландин жалпы үш алтын медаль иеленді (200, 100 және 50 метрге брасс әдісімен жүзу).

- Жүзуші Екатерина Руденко арқамен жүзуден күміс медаль алды. Ол 50 метр қашықтықты 28.04 секундта жүзіп өтті.

- Нұрсұлтан Тұрсынқұлов ушу-саньдадан Қазақстан қоржынына қола медаль салды. Жартылай финалда ол Иран спортшысы Ладвар Хамид Резадан жеңілді.

Әлем

Рокки Марчианоның тарихи нокауты

1952 жыл – жеңіліс көрмеген америкалық боксшы Рокки Марчиано Пенсильванияда өткен жекпе-жекте отандасы Джерси Джо Уолкотты 13-раундта нокаутқа түсірді. Осы жеңісінен кейін Марчиано ауыр салмақтағы әлем чемпионы атанды. Ол чемпиондық атағын қатарынан алты рет қорғады.

Кеңес футболшыларының «Лужникидегі» алғашқы матчы

1956 жыл – Мәскеудегі В.И. Ленин атындағы Орталық стадионда (қазіргі «Лужники») КСРО футбол құрамасы Венгриядан 0:1 есебімен жеңілді. Жолдастық кездесудегі жалғыз голды венгриялық шабуылшы Золтан Цибор 16-минутта Лев Яшин қорғаған қақпаға соқты. Матчты стадионда 100 мыңнан астам көрермен тамашалады.

Автоспорт тарихынан

1973 жыл – америкалық Питер Ревсон McLaren-Ford көлігімен Канада Гран-приінде жеңіске жетті. Екінші орынды Формула-1-дің екі дүркін чемпионы бразилиялық Эмерсон Фиттипальди (Lotus-Ford) иеленді. Үздік үштікті америкалық Джеки Оливер (Shadow-Ford) түйіндеді.

Жарыс «Моспорт-Парк» трассасында өтті. Дәл осы жарыста Формула-1 тарихында алғаш рет қауіпсіздік көлігі — пейс-кар пайдаланылды. Ол жарыс кезінде апат немесе басқа да қауіпті жағдай туындаған кезде қолданылады.

Джерри Кутзидің тарихи жетістігі

1983 жыл – бокстағы тарихи оқиға болды. Джерри Кутзи кәсіпқой бокста ауыр салмақта әлем чемпионы атанған алғашқы африкалық боксшы болды. АҚШ-тың Огайо штатындағы Ричфилд қаласында өткен жекпе-жекте ол америкалық Майкл Доуксты 10-раундта нокаутқа түсіріп, WBA нұсқасы бойынша чемпиондық белбеуді иеленді.

Роза Мотаның Олимпиададағы жеңісі

1988 жыл – аты аңызға айналған португалиялық жеңіл атлет Роза Мота Сеул Олимпиадасында марафоннан алтын медаль жеңіп алды. Ол 42 шақырымдық қашықтықты 2:25:40 нәтижесімен аяқтады.

Күміс жүлдені австралиялық Лиза Мартин (2:25:53), қоланы ГДР өкілі Катрин Дерре (2:26:21) иеленді. Бұл Роза Мотаның Олимпиададағы алғашқы медалі болды. 1984 жылы ол Лос-Анджелес Олимпиадасында қола жүлде алған еді.

Федерер қоштасу матчында көз жасына ерік берді

2022 жыл – 23 қыркүйектен 24 қыркүйекке қараған түні Лондонда аты аңызға айналған теннисші Роджер Федерер кәсіби мансабындағы соңғы матчын өткізді.

Федерер испаниялық Рафаэль Надальмен жұп болып, Лэйвер кубогының алғашқы кездесуінде америкалықтар Фрэнсис Тиафо мен Джек Соктан 4:6, 7:6 (7:2), 9:11 есебімен жеңілді.

Матчтан кейін Федерер эмоциясын жасыра алмай, көрермендердің көз алдында жылап жіберді. Ол кәсіби деңгейде 24 жыл өнер көрсетті. Осы уақыт ішінде швейцариялық теннисші «Үлкен дулығаның» 20 дүркін жеңімпазы және ATP қорытынды турнирінің алты дүркін чемпионы атанды. Сонымен қатар ол әлемнің бірінші ракеткасы ретінде 237 апта қатарынан тұрды.

23 қыркүйектегі қызықты оқиғалар

Сағыздың туған күні

1848 жыл – америкалық кәсіпкер Джон Кертис сағыздың алғашқы үлгісін жасады. Ол кезде өнімді дайындау үшін тек қылқан жапырақты ағаштардан алынатын шикізат пайдаланылды. Кейін Кертис сағыз өндіретін шағын кәсіпорын құрды.

Ролан Гарросстың тарихи ұшуы

1913 жыл – атақты француз ұшқышы Ролан Гаррос Жерорта теңізі үстінен алғашқы рет тоқтаусыз ұшып өтті. Ол монопланымен Францияның Сен-Рафаэль қаласынан Тунистің Бизерта қаласына дейін 7 сағат 47 минутта жетті.

Ұшу кезінде Гаррос жанармай тапшылығына тап болып, қозғалтқышы бірнеше рет істен шыққан. Кейін француз ұшқышының құрметіне Париждегі әйгілі теннис кешені және «Үлкен дулыға» турнирлерінің бірі — Франция ашық чемпионаты Roland Garros деп аталды.

Болашаққа арналған спорттық жолдау

1939 жыл – Нью-Йорктегі дүниежүзілік көрмеде «уақыт капсуласы» жерге көмілді. Мыс, хром және күміс қорытпасынан жасалған капсуланың салмағы шамамен 360 келі болды.

Оның ішіне күнделікті өмірде қолданылатын 100-ден астам зат, соның ішінде гольф добы, бейсбол ойынының сипаттамасы және балалар қуыршағы салынды. Капсуланы тек 5 мың жылдан кейін ашуға болады.

Бұл күні дүниеге келгендер

1956 жыл – Паоло Росси, Италия футболшысы, 1978–1986 жылдар аралығында ұлттық құрама сапында өнер көрсеткен шабуылшы. «Ювентус» құрамында Еуропа чемпиондары кубогы мен УЕФА Суперкубогын жеңіп алған. 2020 жылдың желтоқсанында қайтыс болды.

1996 жыл – Евгений Рылов, ресейлік жүзуші. Рио-де-Жанейро-2016 және Токио-2020 Олимпиадаларының екі дүркін чемпионы, күміс және қола жүлдегері.