Роналдоның ғажайып голы мен Бетербиевтің жарқын жеңісі: әлем спортындағы бұл күн

Автоспорт тарихындағы маңызды күн

1986 жыл – австриялық автокөлік жарысының шебері Герхард Бергер (Benetton-BMW) Мексика Гран-приінде жеңіске жетті. Екінші орынды Формула-1-дің төрт дүркін чемпионы Ален Прост (McLaren-TAG) иеленді. Үздік үштікті Lotus-Renault командасының әйгілі бразилиялық пилоты Айртон Сенна түйіндеді. Бұл Бергер мен Benetton-BMW командасының алғашқы жеңісі еді. Жарыс Мехикодағы Родригес ағайындылары атындағы автодромда өтті.

2003 жыл – Ferrari командасының бразилиялық пилоты Рубенс Баррикелло «Сузука» автодромында өткен Жапония Гран-приінде жеңіске жетті. Екінші болып финляндиялық Кими Райкконен (McLaren-Mercedes), үшінші болып британиялық Дэвид Култхард (McLaren-Mercedes) мәреге жетті. Осы жарыста германиялық Михаэль Шумахер мансабындағы алтыншы чемпиондық титулын жеңіп алып, 1950-жылдары Хуан Мануэль Фанхио орнатқан рекордты жаңартты.

2008 жыл – испаниялық Фернандо Алонсо (Renault) Фудзи тасжолындағы Жапония Гран-приінде бірінші орын алды. Екінші орынды польшалық Роберт Кубица (BMW Sauber), үшінші орынды финляндиялық Кими Райкконен (Ferrari) иеленді.

2014 жыл – Формула-1-дің жеті дүркін чемпионы Льюис Хэмилтон (Mercedes) Ресей Гран-приінде жеңіске жетті. Екінші болып германиялық Нико Росберг (Mercedes), үшінші болып финляндиялық Валттери Боттас (Williams-Mercedes) мәреге жетті. Жарыс Сочидегі «Сочи Автодром» тасжолында өтті.

Мехикодағы Олимпиаданың ашылуы

1968 жыл – Мексика астанасы Мехикода XIX жазғы Олимпиада ойындары басталды. Олимпиада Христофор Колумбтың Американы ашқанына 476 жыл толған күні ашылды. 2016 жылға дейін бұл Латын Америкасында өткен жалғыз Олимпиада болды.

Мехикодағы Олимпиадада:

Мексикалық Энрикета Басилио Олимпиада ойындарының ашылу салтанатында алауды жаққан алғашқы әйел атанды.

Америкалық Вайомия Тайес 100 метрге жүгіруден Олимпиада ойындарында екі рет чемпион атанған алғашқы жеңіл атлет болды.

Бокс тарихынан

1985 жыл – ганалық әйгілі боксшы Азуму Нельсон Бирмингемде өткен турнирде британиялық Кауделл Патрикті бірінші раундта нокаутқа түсірді. Осылайша ол WBC нұсқасы бойынша жеңіл салмақтағы әлем чемпионы атағын қорғап қалды.

«Феноменнің» аңызға айналған голы

1996 жыл – Испания чемпионатының жетінші турында «Барселона» «Компостелланы» 5:1 есебімен ойсырата жеңді. Голдарды Уильям (1-минутта автогол), Джованни (16'), Роналдо (36', 46'), Луиш Фигу (64') және Охен (73') соқты.

«Сан-Ласаро» стадионында өткен кездесудің басты қаһарманы 20 жастағы бразилиялық шабуылшы Роналдо болды. Ол алаң ортасынан бастап қарсылас қақпасына қарай жеке дара шабуыл жасап, бес қорғаушының қарсылығын еңсеріп, ғажайып гол соқты.

Бетербиев пен Биволдың тартысты жекпе-жегі

2012 жыл – Сауд Арабиясының Эр-Рияд қаласында өткен бокс кешінде ресейлік Артур Бетербиев төрешілердің көпшілік шешімімен отандасы Дмитрий Биволды жеңіп, жартылай ауыр салмақта абсолютті әлем чемпионы атанды. Жекпе-жек 12 раундқа созылды.

Боксшылардың қарымта кездесуі 2025 жылдың ақпанында өтті. Бұл жолы Бивол жеңіске жетіп, Бетербиевтен абсолютті чемпион атағын тартып алды.

Мохаммед Салахтың рекорды

2022 жыл – Чемпиондар лигасының топтық кезеңіндегі төртінші турда «Ливерпуль» Шотландияның Глазго қаласында «Рейнджерсті» 7:1 есебімен жеңді. Голдарды Арфилд (17'), Роберто Фирмино (24', 55'), Дарвин Нуньес (66'), Мохаммед Салах (75', 80', 81') және Харви Эллиотт (87') соқты.

Мохаммед Салах Чемпиондар лигасы тарихындағы ең жылдам хет-триктің авторы атанып, Гиннестің рекордтар кітабына енді. Ол үш голды небәрі 6 минут 12 секундта соқты. Бұған дейін бұл рекорд «Лион» клубының шабуылшысы Бафетимби Гомиске тиесілі болып, он жылдан астам уақыт бойы жаңармаған еді.

Әлем тарихындағы 12 қазанда болған оқиғалар

1901 жыл – АҚШ президенті Теодор Рузвельт президент резиденциясына ресми түрде «Ақ үй» атауын берді.

1931 жыл – Рио-де-Жанейроның символына айналған Құтқарушы Христос мүсіні Корковаду тауының басында салтанатты түрде ашылды.

1964 жыл – Байқоңыр ғарыш айлағынан «Восход-1» көпорынды ғарыш кемесі алғаш рет ұшырылды. Ғарышкерлер тарихта тұңғыш рет скафандрсыз ұшты.

1999 жыл – Сараевода Жер шарындағы алты миллиардтық тұрғын дүниеге келді.

Сондай-ақ 12 қазан – интернетте атап өтілетін Шоколадты тосынсыйлар күні.

Бұл күні дүниеге келгендер

1934 жыл – Қабден Байдосов дүниеге келді. Ол – еркін күрестен КСРО-ның алғашқы спорт шебері атанған қазақстандық, Қазақ КСР-інің еңбек сіңірген жаттықтырушысы (1964). Әйгілі балуан 1997 жылдың сәуірінде қайтыс болды.

1970 жыл – испаниялық қақпашы Тони Хименес дүниеге келді. Ол 1992 жылы Барселонада өткен Олимпиада ойындарының чемпионы.