Роналду 981-голын соғып, «Әл-Насрға» жеңіс сыйлады

Сауд Арабиясының астанасындағы қауіпсіздікке төнген қатерге байланысты матч жоспарланған уақыттан кеш басталды. Алайда ойыншылар алаңға шығып, алаң иелері бірден бастаманы өз қолдарына алды.

33-минутта бразилиялық жартылай қорғаушы Анжело Габриэл есеп ашты. Ал 42-минутта Садио Маненің пасынан кейін Айман Яхья допты кеудесімен Роналдуға ыңғайлап тастады. Португалиялық шабуылшы бұрылып соққы жасап, есепті 2:0-ге жеткізді.

Бұл Роналдудың кәсіби мансабындағы 981-голы болды. Енді бес дүркін «Алтын доп» иесіне мансабындағы 1000 голдық межеге жету үшін тағы 19 доп соғу қажет.

Екінші таймның 51-минутында Әлішер Одилов есеп айырмасын қысқартты. Алайда 65-минутта «Нефтчи» ойыншысы Икромжон Әлибаев Мұхамед Симаканға қарсы дөрекі ойнағаны үшін қызыл қағаз алып, алаңнан қуылды.

Сан басымдығын пайдаланған «Әл-Наср» кейін есеп айырмасын қайта екі голға жеткізді. Қорғаушы Анваржон Гафуровтың сәтсіз әрекетінен кейін доп өз қақпасына кіріп, матч 3:1 есебімен аяқталды.

Азия чемпиондар лигасы. Элиталық кезең. 2-тур

«Әл-Наср» (Эр-Рияд, Сауд Арабиясы) – «Нефтчи» (Ферғана, Өзбекстан) – 3:1 (2:0)

Голдар: Анжело Габриэл (33), Криштиану Роналду (42), Анваржон Гафуров (автогол) – Әлішер Одилов (51).

Қызыл қағаз: Икромжон Әлибаев («Нефтчи», 65).

Осылайша, «Әл-Наср» алғашқы турда «Әл-Айннан» 0:4 есебімен жеңілгеннен кейін жеңіске жетіп, турнирдегі алғашқы үш ұпайын еншіледі.

Екі турдан кейін саудиялық клуб Батыс аймағының турнир кестесінде сегізінші орында тұр. Ал бұған дейін Ирактың «Әл-Кува әл-Джавия» командасын 1:0 есебімен жеңген «Нефтчидің» де үш ұпайы бар. Өзбекстандық клуб жетінші сатыда орналасқан.

Азия чемпиондар лигасындағы келесі матчта «Әл-Наср» 26 қазанда БАӘ-нің «Әл-Васл» командасымен кездеседі. Сол күні «Нефтчи» өз алаңында Сауд Арабиясының «Әл-Иттихад» клубын қабылдайды.