Роналду Португалия құрамасындағы мансабын аяқтау туралы шешім қабылдады
Фото: Getty Images
Криштиану Роналду Португалия құрамасындағы 23 жылдық мансабына нүкте қоюы мүмкін. Португалиялық O Jogo басылымының мәліметінше, 41 жастағы шабуылшы ұлттық құрамаға енді оралмау туралы шешім қабылдаған. Дереккөз оның ұстанымы түпкілікті әрі өзгермейтінін жазды.
Егер бұл ақпарат расталса, Криштианудың Португалия құрамасындағы соңғы матчы Ұлттар лигасында 24 қыркүйекте Уэльске қарсы өткен кездесу болады. Роналду негізгі құрамда шығып, алаңда шамамен 65 минут өткізді. Жорже Жезуш шәкірттері 1:0 есебімен жеңіске жетті. Ойыннан кейін капитан: «Алғашқы қадам жасалды. Алға, Португалия!» деп жазды.
Арада үш күн өткенде жағдай күрт өзгерді. Норвегияға қарсы матчта Роналду 2008 жылдан бері алғаш рет ұлттық құраманың ресми кездесуін толықтай қосалқы құрамда өткізді. Финалдық ысқырықтан кейін ол бірден киім ауыстыратын бөлмеге кетіп, жанкүйерлерге алғыс білдірген командаластарына қосылмады.
Кейін Криштиану бірнеше жаттығуға қатыспады. Ал Данияға қарсы ойын алдында Копенгагендегі команданың орналасқан жерінен кетіп қалды. Португалия футбол федерациясы оның кеткенін ресми түрде растады және алдағы матчтарға дайындық капитансыз жалғасатынын хабарлады.
O Jogo мәліметінше, Роналду команда ойыншылары жаттығудан оралмай тұрып-ақ құраманың қонақүйінен кеткен және командаластарымен қоштаспаған. Енді басылым Криштианудың ұлттық құрамаға қайта оралмайтынын жазып отыр.
Бір қызығы, осы оқиғалардан бір апта бұрын Роналду құраманың болашағы туралы өзі айтқан болатын. Сол кезде шабуылшы өзін командаға қажет емес екенін сезінсе, «чемоданын бірінші болып жинайтынын» айтқан. Сонымен қатар халықаралық мансабын аяқтайтын уақыт келгенде бұл туралы жеке мәлімдеме жасайтынын жеткізген.
Роналду Португалия құрамасында 2003 жылдан бері өнер көрсетіп келеді. Оның еншісінде 234 матч пен 146 гол бар. Бұл көрсеткіштер оны ерлер арасындағы халықаралық футбол тарихында өткізген ойындар мен соққан голдар саны бойынша рекорд иегері етеді.
Осылайша, Уэльске қарсы матч әлем футболындағы ең ұзақ әрі айтулы мансаптардың бірінің соңғы кездесуі болып қалуы мүмкін. Роналдудың өзі халықаралық мансабын аяқтағанын әзірге ресми түрде мәлімдеген жоқ. Дегенмен португалиялық басылымдар оның шешімі түпкілікті екенін жазып жатыр.