Рыбакина Нинбодағы жеңісінен кейін WTA рейтингінде көш бастады
Фото: Jimmie48
Қазақстандық теннисші Елена Рыбакина WTA рейтингінің жаңартылған нұсқасында бірінші орнын сақтап қалды. Қытайдың Нинбо қаласында өткен WTA 500 турнирінде жеңіске жеткен спортшының еншісінде 9501 ұпай бар.
Қазақстандық теннисшіден екінші орында тұрған Беларусь өкілі Арина Соболенко 1951 ұпайға қалып келеді. Оның еншісінде 7550 ұпай бар. Үздік үштікті 6306 ұпай жинаған ресейлік Мирра Андреева түйіндеді. Одан кейін америкалық Джессика Пегула (6225) мен Кори Гауфф (5973) орналасқан.
Рыбакина Нинбодағы чемпиондық атағын қорғап, рейтингтегі орнын нығайтты. Финалда ол канадалық Лейла Фернандесті 6:2, 6:2 есебімен жеңді. Кездесу 1 сағат 16 минутқа созылды.
Бұл — қазақстандық теннисшінің биылғы маусымдағы төртінші, кәсіби мансабындағы 15-ші титулы. Бұған дейін Рыбакина 2026 жылы Australian Open, Штутгарттағы WTA 500 турнирі және US Open жарыстарында топ жарған.
Қазақстанның өзге теннисшілерінің рейтингтегі көрсеткіштері де өзгерді. Юлия Путинцева бір саты төмендеп, 969 ұпаймен 67-орынға жайғасты. Соня Жиенбаева 13 орынға сырғып, 153 ұпаймен 394-сатыға түсті. Ал Жібек Құламбаева он орынға көтеріліп, 117 ұпаймен 469-орынға орналасты.
Сондай-ақ Аружан Сағандықова 59 ұпаймен 668-орынға, Асылжан Арыстанбекова 57 ұпаймен 689-орынға көтерілді. Екатерина Дмитриченко 11 сатыға жоғарылап, 31 ұпаймен 873-орынға жайғасты.
Жұптық сындағы рейтингте Қазақстанның үздік теннисшісі — Анна Данилина. Ол 5930 ұпаймен жетінші орнын сақтап қалды. Үздік үштікке чехиялық Катержина Синякова, америкалық Тейлор Таунсенд және бразилиялық Луиза Стефани енді. Ал Жібек Құламбаева үш сатыға көтеріліп, 102-орынға жайғасты.
Нинбодағы турнирде Анна Данилина қытайлық Цзян Синьюймен бірге өнер көрсетті. Қазақстандық-қытайлық жұп алғашқы айналымда америкалық Дезире Кравчик пен венгриялық Фанни Штолларды 3:6, 4:6 есебімен жеңе алмады.