С-тобы: Бразилия, Марокко, Гаити, Шотландия

Бразилия құрамасы

ФИФА рейтингіндегі орны: 6

Әлем чемпионаттарындағы үздік нәтижесі: чемпион (1958, 1962, 1970, 1994, 2002)

Бас бапкері: Карло Анчелотти (Италия)

С тобын әлемдегі ең атақты құрама бастап тұр. Бразилия – бес рет әлем чемпионы атанған жалғыз команда. Сондықтан бразилиялықтар өз тобының ғана емес, бүкіл турнирдің басты фавориттерінің бірі саналады.

Бірақ бір мәселе бар: бразилиялықтар кез келген ірі турнирге дәл осындай мәртебемен келеді. Иә, «сары-жасылдар» әлем чемпионатын бәрінен көп жеңген. Алайда бес титулдың төртеуі өткен ғасырда еншілеген табыс. Ал Бразилия соңғы рет әлем футболының ең басты трофейін 2002 жылы жеңіп алған.

Содан бері бірнеше буын ауысты. Бірақ «доп сиқыршылары» әлем чемпионатында жеңіс тұрмақ, жүлделі орынға да жете алмай келеді. Тіпті өз жерінде өткен 2014 жылғы мундиальда «пентакампеондар» қола үшін матчта Нидерландтан ұтылды. Ал кейінгі екі әлем чемпионатында, 2006 жылғы секілді, ширек финалдан аса алмады.

Дегенмен Бразилия жанкүйерлері тағы да үмітке толы. Оның үстіне бұл жолы жағымды тарихи байланыс та бар. Бұған дейін Солтүстік Америкада өткен әлем чемпионаты, яғни 1994 жылғы АҚШ-тағы мундиаль Бразилияның триумфымен аяқталған еді. Сол финалда Бразилия Италияны пенальти сериясында жеңген болатын. Тағдырдың қызығы сол, қазір «таңдаулыларды» италиялық Карло Анчелотти бастап барады. Ал оның өз елі бұл әлем чемпионатына қатыспайды.

Бразилия құрамасына ілігу – Кембриджге оқуға түскендей қиын дүние. Әр позицияға он шақты үміткер бар. Бұл бұрын да солай болған, қазір де солай. Карло Анчелотти мундиальға Ришарлисон, Антони және Жоао Педро секілді жұлдыздарды шақырмады. Сол үшін оны көпшілік қатты сынға алды.

Бұған қоса, жарақатына байланысты мадридтік «Реалдың» екі ойыншысы – Родриго мен Эдер Милитао әлем чемпионатына қатыспайды. Ал соңғы 15 жыл бойы «әлемнің әлеуетті үздік футболшысы» мәртебесінен түспей келе жатқан Неймар ұлттық құрамаға толық сау күйде келген жоқ. Сондықтан 34 жастағы «Сантос» шабуылшысының турнирдің алғашқы ойындарын өткізіп алуы әбден мүмкін.

Соған қарамастан Бразилияның құрамы өте мықты. «Ливерпуль» қақпашысы Алисон Бекер, ПСЖ қорғаушысы Маркиньос, «Манчестер Юнайтед» жартылай қорғаушысы Каземиро, «Реал» шабуылшысы Винисиус – бәрі де үлкен жеңістердің дәмін татқан жұлдыздар. Бірақ олардың ешқайсысының қоржынында әлем чемпионатының басты трофейі жоқ.

Бразилияның топтан шықпай қалуы үшін ақылға сыймайтын жағдай болуы керек. Дегенмен «пентакампеондар» үшін плей-оффтың алғашқы сатысында тарихи тұрғыдан қолайсыз қарсылас саналатын Нидерландқа тап болмау маңызды. Себебі 1/16 финалда С және F топтарының командалары өзара жолығады.

Жалпы, Бразилияның бұл турнирде чемпион атануы да, финалға жетпей сенсациялық түрде жарыстан шығып қалуы да бірдей мүмкін сценарий секілді. Бірақ бір нәрсені ұмытпайық: дәл Солтүстік Америка жерінде «доп сиқыршылары» төртінші рет әлем чемпионы атанған еді.

Марокко құрамасы

ФИФА рейтингіндегі орны: 8

Әлем чемпионаттарындағы үздік нәтижесі: төртінші орын (2022)

Бас бапкері: Мохамед Уахби

С тобы – 2026 жылғы әлем чемпионатындағы әлемдік рейтингтің алғашқы ондығына кіретін екі құрама қатар түскен жалғыз топ. Біріншісі, әрине, Бразилия. Екіншісі – Марокко. Африкалықтар рейтингте бразилиялықтардан небәрі екі саты төмен тұр.

Бір жағынан, жеребе «Атлас арыстандарына» қатал болды. Екінші жағынан, егер топтан шықса, марокколықтар Бразилиямен кемінде ширек финалға дейін кездеспейді.

Ал Марокконың плей-оффқа шығатынына күмән аз. Бұл команда Еуропаның жетекші клубтарында ойнайтын жоғары деңгейдегі футболшылардан құралған. Құрамда «Реалдың» ойыншысы Браим Диас, «Романың» жартылай қорғаушысы Нейл Эль-Айнауи, «Манчестер Юнайтед» қорғаушысы Нуссаир Мазрауи және ПСЖ сапында УЕФА Чемпиондар лигасының жеңімпазы атанған Ашраф Хакими бар.

Сонымен қатар қазіргі Марокко буыны ірі халықаралық турнирлерде қалай нәтиже көрсету керегін біледі. «Қызыл-жасылдар» өткен әлем чемпионатының ең жағымды сенсациясына айналды. Катардағы мундиальда олар Испанияны, кейін Португалияны жарыстан шығарып, жартылай финалға дейін жетті.

Солтүстік Америкадағы біріншілікке Марокко Африканың ең мықты құрамасы мәртебесінде келеді. Рас, бұл атақ біраз даулы жағдайда бұйырды. 2026 жылғы Африка ұлттары кубогының өз жеріндегі финалында «Атлас арыстандары» Сенегалға пенальти сериясында жол берген еді. Алайда турнир аяқталғаннан кейін екі айдан соң апелляциялық комитет Сенегал тарапынан регламент бұзылғанын анықтап, Мароккоға техникалық жеңіс берді.

Қалай болғанда да, Марокко 2026 жылғы әлем чемпионатына фаворит болмаса да, жоғары орындарға таласа алатын командалардың бірі ретінде барады. Өткен мундиаль бұл ұжым үшін алынбайтын қамал жоқ екенін көрсетті. Сондықтан Марокко ешкімнен қорықпайды. Керісінше, қарсыластары одан сақтануы тиіс.

Гаити құрамасы

ФИФА рейтингіндегі орны: 83

Әлем чемпионаттарындағы үздік нәтижесі: топтық кезең (1974)

Бас бапкері: Себастьен Минье

«Гренадерлер» әлем чемпионатының финалдық кезеңіне тарихында бір-ақ рет шыққан. Бұл 1974 жылы, яғни жарты ғасырдан астам уақыт бұрын болған еді. Сол кезде Германия Федеративтік Республикасында өткен турнирде Гаити топтық кезеңнен аса алмады. Олар Италия, Польша және Аргентинадан жеңіліп, үш матчта жалпы 2:14 есебімен ұтылды.

Алдағы әлем чемпионатында да гаитиліктердің нәтижені айтарлықтай жақсарта қоюы екіталай. Мұндай тұжырымды топтағы қарсыластардың деңгейіне және команданың өз мүмкіндігіне қарап жасауға болады. Француз маманы Себастьен Минье жаттықтыратын құраманың әлеуеті, жұмсақ айтқанда, өте шектеулі.

Гаити сапында нағыз әлемдік деңгейдегі футболшылар жоқ. Құраманың басты жұлдызы саналатын «Сандерленд» шабуылшысы Вильсон Изидор 2025/26 маусымында Ағылшын премьер-лигасында бар болғаны алты гол соқты. Ал 53 жастағы бас бапкер Миньенің кәсіби деңгейде футболшы ретінде де, жаттықтырушы ретінде де бірде-бір трофейі жоқ.

Қысқасы, Гаити үшін осындай өте күрделі топта кемі бір ұпай алудың өзі үлкен қуаныш болмақ. Ал егер олар плей-оффқа шығып жатса, елде осы оқиғаға арнап жаңа ұлттық мереке ойлап табуға болады.

Шотландия құрамасы

ФИФА рейтингіндегі орны: 43

Әлем чемпионаттарындағы үздік нәтижесі: топтық кезең (1954, 1958, 1974, 1978, 1982, 1986, 1990, 1998)

Бас бапкері: Стив Кларк

Шотландия құрамасы әлем чемпионатына сегіз рет қатысқанымен мақтана алады. Бірақ «таулықтардың» мундиальдардағы нәтижесіне бір көз жүгіртсеңіз, олардың ешқашан плей-оффтың алғашқы кезеңіне де шыға алмағанын көресіз.

Оның үстіне XXI ғасырда «тартан армиясы» әлем чемпионатында мүлде ойнаған жоқ. Соңғы рет олар 1998 жылғы мундиальда көрінді. Франциядағы сол турнирде де шотландтар топтық кезеңмен шектеліп, бір ұпаймен өз квартетінде соңғы орын алды.

Қызығы, 28 жыл бұрынғы сол әлем чемпионатында британдықтар дәл осы Бразилия және Мароккомен бір топқа түскен еді. Ол кезде шотландтар оңтүстікамерикалықтарға да, солтүстікафрикалықтарға да есе жіберді.

2026 жылғы әлем чемпионатына жолдама алу Шотландия үшін өте драмалық жағдайда өтті. Іріктеу кезеңінің соңғы турында өз алаңында Даниямен кездескен британдықтар негізгі уақыт аяқталған кезде 2:2 есебімен тең ойнап жатқан еді. Бұл нәтиже оларды іріктеу плей-оффына жіберетін. Бірақ қосымша уақыттың үшінші және сегізінші минуттарында алаң иелері екі гол соғып, әлем чемпионатына тікелей жолдама алды. Ал бақытын өтпелі ойындардан іздеуге мәжбүр болған даттар ақыры мундиальға өте алмады.

Шотландия құрамасы – Британ аралдарында 50 жыл бұрын да, 100 жыл бұрын да ойналған ескі, шынайы футболдың бүгінге жеткен өкілі іспетті. Бұл командада Эндрю Робертсон мен Скотт Мактоминей секілді жоғары деңгейдегі ойыншылар бар. Бірақ олар да ұлттық құраманың қарапайым, бірақ өте адал әрі жанкешті ойынына табиғи түрде сіңісіп кеткен.

2026 жылғы әлем чемпионатында Шотландияға Бразилия және Мароккомен бәсекелесу өте қиын болады. Дегенмен олардың топта үшінші орын алуға нақты мүмкіндігі бар. Ал сәті түссе, бұл орын 1/16 финалға жолдама беруі мүмкін.

Әлем чемпионатының плей-оффына шығу – барлық шотланд жанкүйерінің басты арманы.