Серена көз жасы, аргентиналық драма және Абдулманап Нурмагомедовтың өмірден өтуі: спорт тарихындағы бұл күн

Уимблдон алғаш рет Джоковичке бағынды

2011 – осы күні серб теннисшісі Новак Джокович мансабында алғаш рет Уимблдон чемпионы атанды. Финалда ол испаниялық Рафаэль Надальді 6:4, 6:1, 1:6, 6:3 есебімен жеңді. Жалпы Джоковичтің еншісінде Уимблдонның жеті титулы бар.

Англия Украинаға мүмкіндік бермеді

2020 – осы күні Украина құрамасы Римде өткен Еуропа чемпионатының ширек финалында Англиядан 0:4 есебімен ойсырай жеңілді. «Үш арыстанның» капитаны Гарри Кейн дубль жасаса, тағы бір-бір голдан Гарри Магуайр мен Джордан Хендерсон соқты. Бұл жеңіс Англия құрамасының Еуропа чемпионаттарындағы ең ірі жеңісі саналады.

Мария Шарапованың Уимблдондағы триумфы

2004 – осы күні 17 жастағы ресейлік теннисші Мария Шарапова сенсация жасап, «Үлкен дулыға» турнирлерінің алты дүркін жеңімпазы Серена Уильямсты 6:1, 6:4 есебімен жеңді. Осылайша ол Уимблдонды жеңген алғашқы ресейлік теннисші атанды.

Өзінің «Неудержимая. История моей жизни» атты автобиографиялық кітабында Шарапова бұл матч туралы жазған. Ойын аяқталған соң Серена оны құшақтағанымен, жеңілісті ауыр қабылдағаны байқалған. Кейін Шарапова Уильямстың киім ауыстыратын бөлмеде жылағанын естіген.

UFC-дегі драмалық айқас

2010 – осы күні Лас-Вегаста UFC 116 аралас жекпе-жек турнирі өтті. Кештің басты жекпе-жегінде америкалық Брок Леснар ауыр салмақтағы чемпиондық белдігін қорғады. Оның қарсыласы Шейн Карвин болды. Бірінші раундта Карвин басымдық танытып, Леснарды нокдаунға жіберді. Алайда екінші раундта Леснар бастаманы өз қолына алып, «үшбұрыш» тұншықтыру әдісі арқылы жеңіске жетті.

Марадонаның допинг дауы және Аргентинаның жеңілісі

1994 – осы күні Румыния құрамасы әлем чемпионатының 1/8 финалында Аргентинаны 3:2 есебімен жеңді. Ойын АҚШ-тың Пасадена қаласындағы «Роуз Боул» стадионында өтті.

Дубль авторы Флорин Думитреску болса, тағы бір голды Георге Хаджи соқты. Аргентина Диего Марадонасыз ойнады, себебі ол Нигериямен матчтан кейін алынған допинг-сынамада эфедрин анықталып, бірнеше күн бұрын жарыстан шеттетілген еді. Көшбасшысынан айырылған команда ширек финалға өте алмады.

Прост Сеннаның сериясын тоқтатты

1988 – осы күні француз автожарысшысы Ален Прост McLaren-Honda командасы құрамында Франция Гран-приін жеңіп алды. Жарыс «Поль Рикар» автодромында өтті және Формула-1-дің 1988 жылғы маусымындағы жетінші кезең болды. Бұған дейін Айртон Сенна қатарынан алты поул-позиция жеңіп алған еді. Прост әріптесінің бұл сериясын тоқтатып, өз алаңында поул иеленді.

Стриблингтің жалғыз нокауты және қайғылы тағдыр

1931 – осы күні неміс боксшысы Макс Шмелинг ауыр салмақтағы әлем чемпионы атағын қорғап, америкалық Янг Стриблингті 15-раундта техникалық нокаутпен жеңді. 35 мың көрермен Стриблингтің мансабындағы жалғыз мерзімінен бұрын жеңілісіне куә болды.

Бұл жекпе-жек АҚШ-тағы сол уақыттағы ең ауқымды радиотрансляциялардың бірінің басты оқиғасына айналды. The Ring журналы бұл кездесуді 1931 жылдың үздік жекпе-жегі деп таныды.

Келесі екі жылда Стриблинг тағы бірнеше ондаған жекпе-жек өткізді. Алайда оның өмірі мотоцикл апатынан қайғылы түрде үзілді – ол жаңа туған ұлын көре алмай кетті.

Бір дәуірдің соңы

2020 – осы күні UFC-дің жеңіл салмақтағы бұрынғы чемпионы Хабиб Нурмагомедовтың әкесі әрі бапкері Абдулманап Нурмагомедов өмірден өтті. Оның қайтыс болуына коронавирус себеп болды.

2019 жылдың қыркүйегінде Абдулманап Нурмагомедов Ресей рекордтар кітабына жауынгерлік самбодан ең көп әлем чемпионын (18) тәрбиелеген жаттықтырушы ретінде енген. Оның ең танымал шәкірттері қатарында Хабиб Нурмагомедов, Ислам Махачев, Умар Нурмагомедов, Усман Нурмагомедов және Тагир Уланбеков бар. Оның мектебі Дағыстанда және бүкіл әлемде аралас жекпе-жектің дамуына зор ықпал етті.

Бұл күні дүниеге келгендер:

1997 – Сәкен Бибосынов, қазақстандық боксшы, Токио Олимпиадасының қола жүлдегері.

1987 – Себастьян Феттель, неміс автожарысшысы, Формула-1-дің төрт дүркін чемпионы.

1976 – Вандерлей Силва, бразилиялық ММА жауынгері, Pride ұйымының орта салмақтағы чемпионы. UFC және Bellator ұйымдарындағы жекпе-жектерімен танымал.

1991 – Анастасия Павлюченкова, ресейлік теннисші, Токио Олимпиадасында аралас жұпта алтын жүлде иегері.

1980 – Татьяна Логунова, ресейлік шпагашы, Олимпиада ойындарының екі дүркін чемпионы (Сидней-2000, Афины-2004, командалық сайыс).