Спорт тарихындағы бұл күн: Ғұсман Қырғызбаев пен Анатолий Храпатыйдың Олимпиада медальдары, Лос-Анджелестегі ойындар

Қазақстан:

Анатолий Храпатый Қазақстан ауыр атлетикасының тарихына енді

1996 – осы күні кеңестік және қазақстандық ауыр атлет Анатолий Храпатый (99 кг) Атлантада өткен Олимпиада ойындарының күміс жүлдегері атанды. Қоссайыс қорытындысы бойынша ол 410 келіні көтерді. Бұл Храпатыйдың Олимпиададағы екінші жүлдесі еді. 1988 жылы Сеулде өткен ойындарда ол алтын медаль жеңіп алған.

Анатолий Храпатый 2008 жылдың тамыз айында жол-көлік оқиғасы салдарынан 45 жасында қайтыс болды.

Ғұсман Қырғызбаевтың алғашқы Олимпиада медалі

2024 – осы күні қазақстандық дзюдошы Ғұсман Қырғызбаев (66 кг) Парижде өткен Олимпиада ойындарының қола жүлдегері атанды. Жартылай финалда ол бразилиялық Виллиан Лимеге есе жіберсе, үшінші орын үшін белдесуде сербиялық Страхинья Бунчичтен басым түсті.

Бұл медаль Париж Олимпиадасындағы Қазақстан қоржынына түскен үшінші жүлде болды. Бұған дейін дзюдошы Елдос Сметов алтын медаль жеңіп алса, мергендер Ислам Сатпаев пен Александра Ле қола жүлдеге ие болған еді.

Әлем:

Лос-Анджелестегі Олимпиада ойындарының басталғанына 42 жыл

1984 – осы күні Лос-Анджелесте XXIII жазғы Олимпиада ойындарының салтанатты ашылу рәсімі өтті. Ойындардың ресми ашылуын АҚШ президенті Рональд Рейган жариялады, ал Олимпиада алауын америкалық жеңіл атлет, онсайыс бойынша Олимпиада чемпионы Рафер Джонсон жақты. Ол Олимпиада алауын жағу құрметіне ие болған алғашқы қара нәсілді спортшы болды.

Лос-Анджелестегі Олимпиададағы бойкот және спорт тарихындағы жарқын жетістіктер

Лос-Анджелесте өткен Олимпиада ойындарына 140 елдің спортшылары қатысты. Алайда КСРО, Шығыс Еуропа және социалистік блок елдерінің құрамалары (Қытай, Румыния және Югославиядан басқа) бұл ойындарға бойкот жариялады. Мұндай шешімнің негізгі себептері — КСРО мен АҚШ арасындағы «қырғи-қабақ соғыстың» ушығуы, сондай-ақ 1980 жылғы Олимпиадаға америкалықтар ұйымдастырған бойкот болды.

КСРО-ның Лос-Анджелестегі Олимпиадаға қатысудан бас тартуының ресми себебі ретінде қабылдаушы тараптың кеңестік спортшылардың қауіпсіздігіне қосымша кепілдік бермеуі көрсетілді.

Михаэль Шумахердің жарқын жеңісі

2002 – осы күні германиялық Ferrari командасының автогонщигі Михаэль Шумахер Германия Гран-приінде жеңіске жетті. Екінші орынды Williams-BMW командасынан колумбиялық Хуан Пабло Монтойя иеленсе, үшінші орынға оның командаласы Ральф Шумахер (Михаэль Шумахердің інісі) жайғасты. Бұл Михаэль Шумахердің 1995 жылдан бергі өз еліндегі алғашқы жеңісі әрі Формула-1-дегі бес дүркін чемпион ретіндегі алғашқы жеңісі болды.

Эган Бернальдің тарихи жетістігі

2019 – осы күні колумбиялық велошабандоз Эган Берналь ең беделді көпкүндік веложарыс — «Тур де Франстың» жеңімпазы атанды. Ол жарысты 22 жас 196 күнінде ұтып, «Үлкен шеңбердің» ең жас жеңімпаздарының тізімінде үшінші орынға көтерілді. Бұған дейін тек Анри Корне (19 жас 355 күн) мен Франсуа Фабер (22 жас 187 күн) одан жас кезінде жеңіске жеткен. Сонымен қатар, Берналь Колумбия тарихындағы «Тур де Франсты» жеңіп алған алғашқы спортшы болды.

Бұл күні дүниеге келгендер:

1938 – Луис Арагонес, испаниялық футболшы және ұлттық құраманың бапкері. Ол бапкер ретінде Испания құрамасын Еуро-2008 турнирінде чемпион атандырды.

1969 – Дана Уайт, америкалық кәсіпкер, аралас жекпе-жек саласындағы ең ірі ұйым — Ultimate Fighting Championship (UFC) президенті.

1999 – Наталья Богданова, бокстан Азия ойындарының қола жүлдегері. 2025 жылы ол әлем чемпионаттарында екі медаль жеңіп алды: IBA нұсқасы бойынша «қола» және World Boxing нұсқасы бойынша «алтын».

2005 – Эдуард Ким, синхронды жүзуден өнер көрсететін қазақстандық спортшы, 2023 жылы Фукуокада өткен әлем чемпионатының қола жүлдегері және 2024 жылы Дохада өткен әлем чемпионатының алтын жүлдегері.