Спорт тарихындағы осы күн: Пакьяоның даулы жеңілісі және ғарыштағы алғашқы шахмат ойыны

Қазақстан:

Солтүстік Македония Қазақстанның жолын кесті

2025 жыл – осы күні Астанада 2026 жылғы әлем чемпионатының Еуропа аймағындағы іріктеу кезеңінің 4-туры аясында Қазақстан мен Солтүстік Македония құрамалары кездесті. Матчта қонақтар 1:0 есебімен жеңіске жетті. Кездесудегі жалғыз голды 33-минутта македониялық шабуылшы Александр Трайковски соқты.

Әлем:

Бокс тарихындағы ең даулы шешімдердің бірі

2012 жыл – филиппиндік Мэнни Пакьяо америкалық Тимоти Брэдлиден төрешілердің екіұдай шешімімен жеңіліп, жартылай орта салмақтағы WBO чемпионы атағынан айырылды. Сарапшылардың, журналистер мен жанкүйерлердің басым бөлігі бұл шешімді әділетсіз деп бағалады. Кейін Пакьяо мен Брэдли арасындағы келесі екі кездесу де филиппиндік боксшының айқын жеңісімен аяқталды.

Мәскеудегі тәртіпсіздікке ұласқан жеңіліс

2002 жыл – футболдан әлем чемпионатында Ресей құрамасының Жапониядан 0:1 есебімен жеңілуі Мәскеудің Манеж алаңы мен қала орталығында жаппай тәртіпсіздікке себеп болды.

Ойын аяқталғаннан кейін мыңдаған жанкүйер көшеге шықты. Құқық қорғау органдарының мәліметінше, тәртіпсіздікке шамамен 8 мың адам қатысқан. Соның салдарынан 79 адам зардап шегіп, 49-ы ауруханаға жеткізілді. Қаза болғандардың қатарында жүрегінен пышақ жарақатын алған 17 жастағы Андрей Тружеников та болды.

Моника Селеш дәуірінің басталуы

1990 жыл – 16 жастағы югославиялық-америкалық теннисші Моника Селеш «Ролан Гаррос» турнирінің финалында сол кездегі чемпион Штеффи Графты жеңді. Бір жылдан кейін ол әлемнің бірінші ракеткасы атанды.

Уиттакер чемпиондық белбеуін сақтап қалды

2018 жыл – Чикагода өткен UFC 225 турнирінің басты жекпе-жегінде Роберт Уиттакер мен Йоэль Ромеро қайта кездесті. Төрешілер шешімімен жеңіс Ромероға берілгенімен, кубалық файтер салмақ өлшеу рәсімінен өте алмағандықтан чемпиондық белбеуге таласа алмады. Осылайша Уиттакер титулын сақтап қалды.

Надальдың тарихи рекорды

2013 жыл – Рафаэль Надаль «Ролан Гарростағы» сегізінші чемпиондық атағын жеңіп алды. Сол кезде ерлер теннисі тарихында ешбір спортшы «Үлкен дулыға» турнирінің бірін сегіз рет ұта алмаған еді.

Ғарыштағы алғашқы шахмат матчы

1970 жыл – тарихтағы алғашқы «Ғарыш – Жер» шахмат кездесуі өтті. «Союз-9» ғарыш кемесінің экипажы Андриян Николаев пен Виталий Севастьянов жердегі Николай Каманин мен Виктор Горбаткоға қарсы ойнады.

Партия шамамен алты сағатқа созылып, осы уақыт ішінде ғарыш кемесі Жерді төрт рет айналып шықты. Байланыс радиобайланыс арқылы жүзеге асырылып, жүрістер кеме КСРО аумағының үстінен өткен кезде ғана беріліп отырды. Ойын үшін салмақсыздық жағдайына бейімделген арнайы шахмат тақтасы қолданылды.

Осы күні дүниеге келгендер

1991 жыл – Чжоу Ян, Қытайдың шорт-трек шебері, үш дүркін Олимпиада чемпионы;

1992 жыл – Янник Аньель, француз жүзушісі, екі дүркін Олимпиада чемпионы;

2001 жыл – Аяна Жолдас, қазақстандық фристайлшы, 2018 және 2026 жылғы қысқы Олимпиада ойындарының қатысушысы.