The Athletic «Алтын доп-2026» жүлдесінің басты фавориттерін атады

Басылым бірінші орынға «Бавария» шабуылшысы Харри Кейнді қойды. Екінші орында оның командаласы Майкл Олисе болса, үздік үштікті Родри түйіндеді.

Килиан Мбаппе төртінші орынға жайғасты. Одан кейін Эрлинг Холанд пен Хвича Кварацхелия тұр. Ламин Ямаль жетінші, Луис Диас сегізінші, Джуд Беллингем тоғызыншы орынға орналасты.

Үздік ондықты Лионель Месси түйіндеді. Аргентиналық футболшының үміткерлер қатарына енуі оның рекордтық тарихының жалғасына айналды: Месси «Алтын допты» сегіз рет жеңіп, бұл жүлдені ең көп алған футболшы атанып отыр.

Жаңа рейтингтің жасалуына жүлдеге үміткер 30 футболшының ресми тізімінің жариялануы себеп болды. Номинанттар қатарында Винисиус Жуниор, Усман Дембеле, Витинья, Ашраф Хакими, Деклан Райс және Еуропа футболының өзге де жұлдыздары бар.

Кейннің көш бастауы ерекше назар аудартады. Англиялық футболшы бірнеше жылдан бері Еуропадағы ең тұрақты сұрмергендердің бірі саналады, алайда бұған дейін «Алтын допты» жеңіп көрген емес. Енді The Athletic оны жеке жүлде үшін күресте дәстүрлі түрде басты фавориттердің қатарында саналатын бірнеше жұлдыздан жоғары қойды.

Тағы бір назар аударарлық жайт рейтингтің алғашқы екі сатысында «Баварияның» екі ойыншысы орналасқан. Олисе аз уақыттың ішінде мюнхендік клубтың негізгі футболшыларының біріне айналды. Басылымның нұсқасы бойынша, қазіргі таңда ол Мбаппе, Холанд және Ямальдан да жоғары тұр.

Бұл ретте The Athletic рейтингі «Алтын доп» үшін өтетін ресми дауыс беру нәтижесі емес. Бұл басылымның қазіргі сәттегі бағасы ғана. Жүлденің нақты иесін марапатқа дауыс беруге қатысатын журналистер анықтайды.

«Алтын доп-2026» жүлдесін табыстау рәсімі 26 қазанда Лондондағы Palladium театрында өтеді. Жүлде тарихында алғаш рет салтанатты рәсім Лондонда ұйымдастырылады. Биыл «Алтын доп» жүлдесінің табысталып келе жатқанына 70 жыл толады. Алғашқы марапат 1956 жылы Стэнли Мэттьюзге берілген болатын.