Ұлттар лигасы: Португалия Роналдусыз Норвегияны жеңіп, ширек финалға шықты
Фото: FPF
Португалия құрамасы Ұлттар лигасында қатарынан төртінші жеңісіне қол жеткізді. Португалдар Портудағы «Драгау» стадионында Норвегияны 2:1 есебімен жеңді.
Норвегия 36-минутта Кристоффер Аердің голы арқылы есеп ашты. Алайда араға екі минут салып, Жоау Канселу алыстан соққы жасап, есепті теңестірді. 79-минутта Жоау Феликстің пасынан кейін Гонсалу Рамуш жеңіс голын соқты.
Матчтың соңына қарай алаң иелері он ойыншымен қалды. Франсишку Консейсау Норвегия құрамасының айып алаңындағы эпизодтан кейін төрешімен дауласып, қатарынан екі сары қағаз алды. Нәтижесінде ол 86-минутта алаңнан қуылды. Португалия қалған уақытта есепті сақтап қалды.
Айта кетейік, Криштиану Роналду Португалия құрамасының бұл матчқа арналған өтініміне енген жоқ. Бұған дейін капитан командадағы рөліне қатысты келіспеушіліктен кейін ұлттық құраманың орналасқан жерінен кеткен еді. Роналдусыз Португалия қатарынан екінші матчта жеңіске жетті. Норвегиямен кездесуге дейін Жорже Жезуштің командасы Данияны 4:2 есебімен жеңген болатын.
Төрт турдан кейін Португалия 12 ұпай жинап, топтық кезең аяқталуына екі тур қалғанда ширек финалға шығатын жолдаманы мерзімінен бұрын қамтамасыз етті. Дания алты ұпаймен екінші орында тұр. Норвегия мен Уэльстің еншісінде үш ұпайдан бар.