В-тобы: Канада, Қатар, Швейцария, Босния және Герцеговина

Канада құрамасы

ФИФА рейтингіндегі орны: 30

Әлем чемпионаттарындағы үздік нәтижесі: топтық кезең (1986, 2022)

Бас бапкері: Джесси Марш (АҚШ)

Әлем чемпионатын қабылдайтын елдердің бірі – Канада құрамасы. Оның үстіне жеребе олар үшін Мексика мен АҚШ-қа қарағанда әлдеқайда қолайлы түсті. В тобындағы ең мықты қарсылас ретінде Швейцария құрамасы көрінеді. Дегенмен швейцариялықтарды әлем футболының алпауыттары қатарына қосу қиын.

Соған қарамастан канадалықтардың өзі де КОНКАКАФ аймағының көшбасшылары қатарына жатпайды. Соңғы екі Алтын кубокта олар ширек финалдан аса алмады. Ал әлем чемпионаттарындағы көрсеткіші тіпті көңіл көншітпейді.

Канада тарихында небәрі екі рет әлем чемпионатының финалдық кезеңіне жолдама алған. 1986 және 2022 жылдары қатысқан екі турнирде де топтық кезеңнен аса алмады. Оның үстіне өткізген алты матчтың бәрінде жеңіліс тапқан. Бас бапкер Джесси Марштың да футболшы ретінде ірі турнирлерде ойнау тәжірибесі жоқтың қасы. Ол АҚШ құрамасы сапында бар болғаны екі матч өткізген.

Ал жаттықтырушы ретіндегі басты жетістіктері клубтық деңгейде тіркелді. Ол «Зальцбургпен» екі рет Австрия чемпионаты мен Кубогын жеңіп алып, «Нью-Йорк Ред Буллзды» MLS тұрақты чемпионатының жеңімпазы атандырды.

Қазір Канада құрамасының тарихтағы ең үздік нәтижесіне қол жеткізуге тамаша мүмкіндігі бар. Тек алғашқы жеңісін тіркеп қана қоймай, плей-офф кезеңіне шығуы да ғажап емес.

Бұған топтағы қарсыластардың деңгейі де, құрамдағы жұлдыз ойыншылардың болуы да әсер етеді. Қақпада Дейн Сент-Клэр, қорғаныста Альфонсо Дэвис, жартылай қорғауда Тейджон Бьюкенен, ал шабуыл шебінде Джонатан Дэвид бар.

Қатар құрамасы

ФИФА рейтингіндегі орны: 55

Әлем чемпионаттарындағы үздік нәтижесі: топтық кезең (2022)

Бас бапкері: Хулен Лопетеги (Испания)

В тобының басты аутсайдері ретінде көпшілік Қатар құрамасын атап жүр. Бұған ФИФА рейтингіндегі орны да, құрамында әлемдік деңгейдегі жұлдыздардың болмауы да себеп. Командадағы барлық футболшы Азия клубтарында өнер көрсетеді.

Сонымен қатар құрамда бір ғана натурализацияланған ойыншы қалды. Ол – Бразилияда туған Эдмилсон Жуниор. Сондықтан катарлықтар негізінен өз футбол мектебінің түлектеріне сенім артады.

2026 жылғы әлем чемпионаты Катар тарихындағы екінші мундиаль болмақ. Бірақ бұл жолы олар жарысқа алғаш рет іріктеу кезеңі арқылы жолдама алды. Ал 2022 жылғы үйдегі әлем чемпионаты катарлықтарға қуаныштан гөрі өкініш сыйлады. Үш матчтың үшеуінде де жеңіліп, топ соңында қалды.

Сондықтан бұл жолы Катардың нәтижені түбегейлі жақсартуы қиын көрінеді. Команданың басты үміті – тәжірибелі бапкер Хулен Лопетеги. Алайда испан маманы әзірге ұлттық құрамалар деңгейінде ірі жетістікке жете қойған жоқ.

Швейцария құрамасы

ФИФА рейтингіндегі орны: 19

Әлем чемпионаттарындағы үздік нәтижесі: ширек финал (1934, 1938, 1954)

Бас бапкері: Мұрат Якин

Швейцария – В тобының айқын фавориті. Мұрат Якин шәкірттерінің плей-оффқа шығатынына күмән жоқ. Оның үстіне топты бірінші орынмен аяқтауға да мүмкіндігі жоғары.

Алайда швейцариялықтардың басты мәселесі – плей-оффтағы сәтсіздіктері. Команда соңғы бес әлем чемпионатының барлығына қатысып, төрт рет топтық кезеңнен өтті. Бірақ сол төрт жағдайдың бәрінде алғашқы плей-офф матчынан кейін жарыспен қоштасты.

Әсіресе 2022 жылғы әлем чемпионатындағы Португалиядан 1:6 есебімен ойсырай жеңілген кездесу жанкүйерлердің жадында әлі сақтаулы.

Швейцария құрамасы дәстүрлі түрде Еуропаның үздік лигаларында өнер көрсететін тәжірибелі ойыншыларға сүйенеді. Қазіргі құрамда дортмундтық «Боруссияның» қақпашысы Грегор Кобель, «Интердің» қорғаушысы Мануэль Аканджи, «Монаконың» жартылай қорғаушысы Денис Закария және шабуылшы Рубин Варгас бар.

Босния және Герцеговина құрамасы

ФИФА рейтингіндегі орны: 65

Әлем чемпионаттарындағы үздік нәтижесі: топтық кезең (2014)

Бас бапкері: Сергей Барбарез

ФИФА рейтингінде Босния және Герцеговина тіпті Қатардан да төмен орналасқан. Бірақ бұл оларды топтың басты аутсайдері деуге негіз бола алмайды.

Балқандықтардың әлем чемпионатына жолы түспейді деп есептелген. Бірақ олар іріктеу кезеңінде нағыз ерлік көрсетті.

Алдымен Румыниямен болған маңызды кездесуде жағдайды өз пайдасына өзгертіп, 3:1 есебімен жеңіске жетті. Одан кейін плей-оффта Уэльс пен Италияны пенальти сериясында ұтып, әлем чемпионатына жолдама алды. Әсіресе төрт дүркін әлем чемпионы Италияны жарыс жолынан шығаруы үлкен сенсация болды.

Осындай қиын сынақтардан өткен соң босниялықтар үшін Канада, Қатар немесе Швейцариядан қорқудың жөні жоқ. Боснияның әлем чемпионатына қатысу тәжірибесі де бар. 2014 жылғы Бразилиядағы турнирде олар топтан шыға алмағанымен, Иранды 3:1 есебімен жеңген. Сол матчта гол соққан Эдин Джеко бүгінде 40 жасқа толса да құраманың көшбасшысы саналады.

Құрамда Германия Бундеслигасы, Италия А сериясы мен Франция Лигасы ойыншылары бар. Сондай-ақ Қазақстан Премьер-лигасының да өкілі кездеседі. Қорғаушы Иван Башич – ҚПЛ-дан әлем чемпионатына қатысатын жалғыз футболшы.

Босниялықтарға ешқандай қысым болмайды. Жанкүйерлердің өзі әлем чемпионатына жолдама алғанына риза. Сондықтан еркін ойнайтын «айдаһарлар» турнирдің басты сенсацияларының біріне айналуы әбден мүмкін.