Альварестің голы «Атлетикоға» бір ұпай сыйлады
«Штутгарт» ФК
УЕФА Чемпиондар лигасының жалпы кезеңіндегі үшінші турда Германияның «Штутгарт» және Испанияның «Атлетико» командалары 1:1 есебімен тең түсті. Матч 20 қазанда Штутгарт қаласындағы «МХП-Арена» стадионында өтті.
УЕФА Чемпиондар лигасы. Жалпы кезең. 3-тур
«Штутгарт» (Германия) – «Атлетико» (Испания) – 1:1
Голдар: Левелинг 36, Альварес 47.
Қызыл қағаз: Юльманн 64 («Атлетико»).
Кездесуді алаң иелері белсенді бастап, Ян Облак қорғаған қақпаға бірнеше қауіпті шабуыл жасады. Словениялық қақпашы бірқатар соққыны қайтарғанымен, 36-минутта Джейми Левелингтің соққысына тосқауыл бола алмады. «Штутгарт» жартылай қорғаушысы айып алаңының сыртынан допты қақпаның алыс бұрышына дәл бағыттады.
Екінші тайм басталған бойда мадридтік команда есепті теңестірді. Алаңға қосалқы құрамнан шыққан Адемола Лукман айып алаңына пас беріп, Хулиан Альварес 47-минутта допты қақпаға тоғытты.
64-минутта «Атлетико» бір ойыншыға кем қалды. Даниялық жартылай қорғаушы Мортен Юльманн Ангело Штиллерге қарсы дөрекі ойнап, тікелей қызыл қағаз алды.
Сан басымдығын иеленген «Штутгарт» қарсылас қақпасына қысымды күшейтті. 81-минутта Джефф Шабо бұрыштама добынан кейін баспен соққы жасады, алайда доп қақпадан сәл қиыс кетті. Осылайша, неміс командасы қарсыласының алаңнан қуылған ойыншысын пайдаланып, жеңіске жете алмады.
Үш турдан кейін «Штутгарттың» еншісінде жеті ұпай болса, «Атлетикода» төрт ұпай бар. Келесі турда 3 қарашада неміс командасы сырт алаңда «Галатасараймен» кездессе, мадридтіктер «Баварияны» қабылдайды.
Матчтың бейнешолуы: