Әлімханұлының АҚШ-тағы жекпе-жегі және Коби Брайанттың НБА-дағы дебюті: 3 қарашада әлем спортында не болды?

Қазақстан:

Әлімханұлының АҚШ-тағы жеңісі

2018 жыл – осы күні қазақстандық боксшы Жәнібек Әлімханұлы АҚШ-тың Техас штатындағы Эль-Пасо қаласында өткен турнирдің басты жекпе-жегінде америкалық Вон Александерді төрешілердің екіге бөлінген шешімімен жеңді (79:73, 78:74, 75:77). Супер орта салмақтағы кездесу сегіз раундқа созылды.

Алматылық команданың триумфы

2020 жыл – алматылық «Қайрат» 16 жыл үзілістен кейін Қазақстан чемпионы атанды. 17-турда алматылық клуб шымкенттік «Ордабасыны» 3:1 есебімен жеңіп, мерзімінен бұрын чемпиондық атақты қамтамасыз етті.

Голдарды Вагнер Лав (36-минут), Нұралы Әліп (39) және Жоао Пауло (77) соқты. Ал 80-минутта Ұлар Жақсыбаев автогол авторы атанды. Бұған дейін «Қайрат» 2004 жылы Премьер-лига чемпионы болған еді.

Әлем:

Формула-1 тарихындағы оқиғалар

1991 жыл – Формула-1-дің үш дүркін чемпионы Айртон Сенна (McLaren-Honda) Аустралия Гран-приінде жеңіске жетті. Екінші орынды Найджел Мэнселл (Williams-Renault), үшінші орынды Герхард Бергер (McLaren-Honda) иеленді. Жарыс Аустралияның Аделаида қаласындағы трассада жаңбырлы ауа райында өтті.

2013 жыл – германиялық Себастьян Феттель (Red Bull-Renault) Абу-Даби Гран-приінің жеңімпазы атанды. Екінші орынды Марк Уэббер (Red Bull-Renault), үшінші орынды Нико Росберг (Mercedes) иеленді. Жарыс БАӘ-дегі «Яс Марина» трассасында өтті.

2019 жыл – финляндиялық Валттери Боттас (Mercedes) АҚШ Гран-приінде топ жарды. Екінші болып Льюис Хэмилтон (Mercedes), үшінші болып Макс Ферстаппен (Red Bull-Honda) мәреге жетті. Екінші орын алған Хэмилтон осы жарыстан кейін мансабындағы алтыншы әлем чемпионы атағын мерзімінен бұрын қамтамасыз етті.

Токиодағы рекорд

1935 жыл – кореялық жеңіл атлет Сон Ки Джон Токиода өткен марафонда 2 сағат 26 минут 42 секунд нәтижесімен әлемдік рекорд орнатты. Кейін ол «Менің Отаным және марафон» атты өмірбаяндық кітабын жазды.

Велоспорт тарихынан

1937 жыл – француз велошабандозы Морис Аршамбо Миландағы «Вигорелли» велодромында бір сағаттық жарыста әлемдік рекорд орнатты. Ол бір сағатта 45 шақырым 767 метр қашықтықты бағындырды. 1942 жылы бұл көрсеткішті италиялық аңыз велошабандоз Фаусто Коппи жаңартып, 45 шақырым 798 метрге жеткізді.

Коби Брайанттың НБА-дағы алғашқы матчы

1996 жыл – әйгілі америкалық баскетболшы Коби Брайант НБА-дағы алғашқы матчын өткізді. Оның командасы «Лос-Анджелес Лейкерс» тұрақты чемпионаттағы екінші ойында «Миннесота Тимбервулвзды» 91:85 есебімен жеңді. Сол кезде Брайант небәрі 18 жаста және 72 күндік еді.

Жарқын жекпе-жек

2018 жыл – америкалық Дэниэл Кормье отандасы Леннокс Льюисті екінші раундта тұншықтыру әдісімен жеңіп, UFC-дің ауыр салмақтағы чемпиондық белбеуін қорғады. Жекпе-жек Нью-Йоркте өткен UFC 230 турнирінде ұйымдастырылды.

3 қарашада әлемде атап өтілетін күндер:

- Халықаралық калькулятор күні;

- Дүниежүзілік медуза күні;

- Дүниежүзілік косплей күні.

1907 жыл – француз механигі Поль Корню әлемдегі алғашқы тікұшақпен ұшты. Әуе көлігі шамамен 20 секунд бойы ауада болды.

1954 жыл – Жапонияда «Годзилла» фильмінің тұсаукесері өтті.

Бұл күні дүниеге келгендер:

1945 жыл – Герд Мюллер, «Баварияның» аңызға айналған шабуылшысы, әлем және Еуропа чемпионы. Еуропа чемпиондары кубогының (қазіргі Чемпиондар лигасы) үш дүркін жеңімпазы. Футбол тарихындағы үздік сұрмергендер тізімінде тоғызыншы орында.

1982 жыл – Евгений Плющенко, ресейлік мәнерлеп сырғанаушы. Олимпиада ойындарының екі дүркін чемпионы және екі дүркін күміс жүлдегері.