«Барыс» бапкері маусым алдындағы турнирлердегі сәтсіз нәтижелерді түсіндірді
Фото: hcbarys.kz
«Барыстың» бас бапкері Михаил Кравец команданың маусым алдындағы дайындығын қорытындылап, ҚХЛ жаңа маусымы басталар алдында клубтың қандай кадрлық қиындықтарға тап болғанын айтып берді.
Тамыз айында астаналық команда бірден екі турнирге – Уфадағы Башқұртстан Республикасы кубогы мен Санкт-Петербургтегі Николай Пучков атындағы турнирге қатысты. Алты матчта «Барыс» небәрі екі жеңіске жетті. Дегенмен бапкерлер штабы бұл кездесулерді тек нәтиже үшін емес, әртүрлі ойыншылар комбинацияларын сынау мақсатында да пайдаланды.
Кравецтің айтуынша, команда маусым алдындағы дайындықты бастапқыда жоспарланған құраммен өткізе алмады.
«Өкінішке қарай, біз өзіміз қалаған құраммен ойнай алмадық. Морелли отбасылық жағдайына байланысты болмады және енді ғана оралып жатыр. Кадр мәселесіне қатысты басқа да қиындықтар болды: мәселен, Джастин Бэйли визасын уақытында рәсімдеп үлгермеді. Сондықтан құрам нұсқаларын үнемі өзгертіп, әртүрлі байланыстарды сынауға тура келді», – деді маман.
Сонымен қатар Кравец мәжбүрлі өзгерістер бапкерлер штабына команданың құрам тереңдігін жақсырақ бағалауға мүмкіндік бергенін мойындады.
«Бір жағынан, мұндай жағдай тіпті пайдалы болды. Біз іс жүзінде барлық ойыншыны қарап шықтық. Оқу-жаттығу жиындары басталғанға дейін таңдау мүмкіндігі кең болады деп ойладық. Алайда алғашқы турнирлер мен жаттығулардан кейін әзірге барлығы бірдей ҚХЛ деңгейіне тұрақты түрде сәйкес келе алмайтыны белгілі болды», – деп қосты бапкер.
Оның сөзінше, қазіргі уақытта бапкерлер штабы команданың негізгі құрамын анықтап, жақын арада сенім артатын хоккейшілерді іріктеп қойған.
«Қазір біз шынымен пайдалануды жоспарлап отырған жігіттерді қалдырдық. Әрі қарай «Снежные Барсы» мен «Номад» бапкерлерімен сөйлесіп, назарымызда жүрген хоккейшілерді бақылауды жалғастырамыз. Егер олардың біреуі өзін жақсы қырынан көрсетсе, оны негізгі командаға тарту мүмкіндігін міндетті түрде қарастырамыз», – деді Кравец.
Осылайша, «Барыс» үшін маусым алдындағы турнирлердің қорытындысы нәтижеден гөрі ҚХЛ-дағы ресми маусым басталар алдында құрамды бағалау тұрғысынан маңызды болды.
ҚХЛ-дағы 2026/27 жылғы маусымын астаналық клуб 7 қыркүйекте өз алаңында новосібірлік «Сибирьге» қарсы матчпен бастайды.