«Баварияның» тең ойыны, «Барселонаның» ірі жеңісі және «Сабахтың» тарихи нәтижесі
Фото: Getty Images
14 қазанға қараған түні Чемпиондар лигасының 2026/27 жылғы маусымындағы жалпы кезеңнің екінші туры аясындағы алғашқы ойын күні аяқталды. Тоғыз матчта жанкүйерлер сенсациялық нәтижелерге, ірі жеңістерге және Қазақстан құрамасының қақпашысы Стас Покатилов өнер көрсететін команданың тарихи жетістігіне куә болды.
Басты сенсация Норвегияда тіркелді. Жергілікті «Викинг» Мюнхеннің «Бавариясымен» 3:3 есебімен тең түсті. Неміс клубы 0:2 есебімен жеңіліп жатып, есепті теңестіріп қана қоймай, алға да шықты. Алайда 90-минутта гол жіберіп алды.
Ыстамбұлда өткен матч та тартысты болды. «Галатасарай» ресейлік Алексей Батраковтың голының арқасында есеп ашқанымен, «Барселона» төрт гол соғып, 4:1 есебімен ірі жеңіске жетті.
Лондондық «Арсенал» «Лилльді» 3:0 есебімен ойсырата жеңсе, «Атлетико» «Манчестер Юнайтедтен» 2:0 есебімен басым түсті. Миланда да күтпеген нәтиже тіркелді: «Интер» бельгиялық «Брюггеге» 3:4 есебімен жол берді.
Бұл кеш Қазақстан үшін де ерекше болды. Әзербайжандық «Сабах» Праганың «Славиясын» 2:0 есебімен жеңіп, Чемпиондар лигасының жалпы кезеңіндегі алғашқы жеңісіне қол жеткізді. Команда капитаны Стас Покатилов алты сейв жасап, қақпасын голдан аман сақтады.
Чемпиондар лигасы. Жалпы кезең. 13 қазандағы матчтардың нәтижелері:
Екінші ойын күні кімдер кездеседі?
14 қазанда Чемпиондар лигасының жалпы кезеңі тағы тоғыз матчпен жалғасады. Кештің басты кездесулері – «Манчестер Сити» мен ПСЖ, сондай-ақ «Рома» мен «Реал Мадрид» арасындағы ойындар.
Бұдан бөлек, алаңға «Ливерпуль», дортмундтық «Боруссия», «Астон Вилла», «Фенербахче» және басқа да командалар шығады. Қазақстан уақытымен матчтардың басым бөлігі 15 қазанға қараған түні өтеді.